Tag: Acordu

Aleptu tru meslu brumar, năulu prezidentu ali Românie, Klaus Iohannis, ahurheaşti tra s-bagă tru lucru urnechea ţi u tăxi tru campania electorală. După aţel’i dzaţi an’i tru cari predecesorlu a lui, Traian Băsescu, u cumăndusi România fără să-şi ascundă niţi simpatiile, niţi idiosincraziili politiţi, fostul lider liberal Iohannis să spuni isa andicra di partidi, pisupră di alumtili cu miză n’ică dit Parlamentu. Luni, el amintă acordul a tutălor formaţiun’ilor politiţi reprezentati tru Legislativ tră asiguripsearea, cafi an, ahurhindalui dit 2017 şi până tru 2027, naima pţăn 2% dit PIB tră Apărari.

Tru harea di comandantu suprem a forţilor di ascheri, prezidentul spuni că criştearea a bugetlui tră Apărari easti anănghisită, ti furn’ia că România lipseaşti s-armână tru gardă, pi fondul a crizăl’ei dit Ucraina viţină. Membru ali Uniuni Europeană şi NATO, Bucureştiul nu lipseaşti s-bagă besă maşi pi aliaţ tră asiguripsearea a securitatil’ei işiş, nica spuni Klaus Iohannis :

“Avem borgea s-mutrim cu mintimini’e situaţia dit regiune şi să scutem tru videală că him ună naţiuni responsabilă. Ti aţea, agiumsim pi isapea că lipseaşti s- asiguripsim hălăţli anănghisiti ti Ascherea Româna tra s-putem s-ufilisim fondurli ţi suntu ananghi tră pregătiri şi tră programili di armătuseari cu tehnea di alumtă modernă.”

Prota-avyiulie ali coaliţie guvernamentală ţi vini la puteari aoa şi aproapea trei an’i, tru arada a curi chiverniseaşti nica şi portofoliul ali Apărari, PSD apruche păn di mardzină iniţiativa prezidenţială. Premierlu social-democrat Victor Ponta:

“Vrem că aţea ţi ahurhim tru 2012, dimec tru cathi an ma mulţă păradz tră sistemlu di apărari, s-hibă un proces pi lungu chiro şi ambărţitat di tuti forţili politiţi, cari ţi s-hibă momentul tru cari easti tora la guvernari ică tru opoziţie.”

Cum s-aştipta, şi clirunomlu al Iohannis agiumtu la fărnurli ali opoziţie libearală, Alina Gorghiu, apruche cu harauă acordul politic pripus di şeflu a statlui:

“Avem garanţia, că, aestă aradă, la iniţiativa a prezidentului ali Românie, aestu acordu va s-agiungă realitati şi România va s-treacă di la haraua că easti văsilie NATO la borgea ţi u caftă aestu angajamentu.”

Acordul fu îmbărţitat, em di UNPR em di PC, parteneri juniori la co-guvernari, ama şi, di partiili di nafoara ali coaliţie, dimec di UDMR, PP-DD şi gruplu parlamentar a minorităţlor naţionali. Momentu aretcu tru politica românească tru an’il’i di ma năpoi, acordul mutrindalui finanţarea ali ascheri poati s-hibă, spun analiştil’i, ahurhita a unăl’ei nauă minduită tra s-chivernisească mărli dosari ali administraţie di Bucureşti.

Armânipserea: Tascu Lala