Radio România Internațional

Tag: AGIUTOR.

  • Hăbări ditu bana românească şi internaţională

    Hăbări ditu bana românească şi internaţională

    NATO. România ari aştiptări multu concreti” di la summitul NATO, spune prezidentul Iohannis cari reprezintă România la evenimentul di Madrid, cari adună şefañi di stat şi di guvern ditu văsiliili aliate. Iohannis cundille că easti ananghi ti anvărtuşearea maxusus a flancului estic, creaștirea a numirlui di trupe dislocate tru regiune, declarânda Amarea Lae zonă di sinferu strategic, lugursinda Rusia ună fuvirseari semnificativă tră alianță, iara pareili di alumtă s’hibă adusi tru scara di brigădz. NATO easti garanția securitatillei a noastre și tru aestu kiro ndilicatu tru cari Rusia u atacă Ucraina și noi himu viţiñilli a llei, dukimu cătu importantă easti aumbrela NATO tră securitatea a noastră, ti iţi român”, spusi Iohannis. Bruxelles, prezidentul a Româniillei easti aștiptatu s’lu spună diznău agiutorlu pănu di mardzină ali Românie tră politiţli NATO cu uși dişcllisi, nica şi tră aderarea ali Finlandă și Suedie. Turchia, cari până marță s’ncuntra ti aderarea aţiloru două văsilii, apruke păn tru soni s’ndrupască inițiativa aluştoru. Uidisitu cu corespondentulu Radio România la Madrid, prezidentul ali Ucraina, Volodymyr Zelenski, va s’tănă unu zboru online tru prima sesiune a summit-lui.



    VIZITĂ Premierlu român Nicolae Ciucă lu aştiptă Bucureşti secretarlu gheneral a Ligăllei Statelor Arabe, Ahmed Aboul Gheit. Andamusea fu ună bună ispeti tra s’yilipsească poziția constantă pi cari România u ari tru ligăturli cu statele arabe și abordarea a llei consecventă a Proţesului di irini ditu Orientul di Mesi, să spuni tru un comunicat a guvernului. Aţelli doi oficiali feaţiră muabeti ti impactul a fuvirsearillei militară ali Rusie tru Ucraina și agiutorlu datu di România și văsiliili parteneri tră arifugaț. Premierlu român tricu tru revistă catandisea a securitatillei ditu reghiuni, di itia că experțălli lugursescu că Rusia va s’ducă un polimu di uzură tru Ucraina. Ahmed Aboul Gheit cundille gaereţli a Ligăllei Statelor Arabe tră aflarea a unei cearei iriñieatică la criză și haristusi ali Românie tră gaereţli tra s’aprovizioneadză văsiliili arabe cu yiptu.



    COVID-19 Numirlu a infecțiilor cu Covid-19 easti diznău tru creaștire tru România, cu aproapea 4 ñilli di infecții nregistrate stămâna tricută la nivel național, cu 14 suti ma multi andicra di stămâna preţedintă. Criscu și numirlu a paciențălor cari au ananghi di yitripseari spitalicească, di la 458 la 638, cu 58 di persoane tru TI. Tutunăoară, fură raportate 13 dicese, ditu cari dzaţi eara persoane nivaccinate.



    ENERGY România poate s’agiungă indipendintă energetic și un furnizor di securitate energetică tru regiune, cum și ună cali di transportu tră gaze și energie veardi tru Amarea Caspică, spusi ministrul Energiillei a v4siliillei, Virgil Popescu. Diadunu cu premierul Ciucă, aestu lo parti, marță, la ţeremonia ndreaptă cu furñia ahurhearillei lucărlu ti exploatarea a gazilor la Midia, tru Amarea Lae operată di Black Sea Oil&Gas. Aproapea un miliard di metri cubi di gaze suntu aștiptati s’hibă extraasi aoa anual.



    AGIUTOR. Comisia Europeană aprobă ună schemă di agiutor tru valoari di 60,7 milioane di euro tră agiutarea a transportatorilor rutieri ditu România. Apofasea ari tru planu tuti companiile cu licență comunitară valabilă, cari fură zñiipsiti di actuala criză, di itia ali aputruseari arusă tru Ucraina. Agiutorlu nu năstreaţi 400 di ñilli di euro pi ntreprindiri și va s’da până tru andreu 2022.



    Autoru: Udălu a hăbărloru


    Armânipsearia: Taşcu Lala

  • Zborlu ţănutu di prezidentulu Zelenski tru Parlamentul a Româniillei

    Zborlu ţănutu di prezidentulu Zelenski tru Parlamentul a Româniillei

    Di la invazia niprovocată și paranomu ali Rusie tru Ucraina, tu 24 şcurtu, liderul di la Kiev, Volodimir Zelenski, avu intervenţii video tru Parlamentele ditu Marea Britanie, Canada, Statele Unite, Germania, Italia, Israel și Polonia ică tru Parlamentul European ili tru cadrul a summitului NATO, ditu marţu, di la Bruxelles. Luni, vini arada a reprezentanțălor a Româniillei tru Legislativ s’ascultă pledoaria ti dănăsearea-a polimlui, pritu videoconferință, a prezidentului Zelenski, la şcurtu kiro după ţi aestu eara dusu s’veadă Bucea, ningă Kiev – teatru a născăntoru atrocităţ atribuite rușilor ţi adusiră consternare și reacții di condamnare susto tru tută lumea. Dimi, ninti di mesajlu adresat di prezidintulu ali Ucraină tră parlamentarlli români, pi panoul central ditu sala di plen s’dizvărtiră imagini cu fănicadzlli a polimlui: cufumi pi geadei, casi asparti, groki comune…



    Tru zborlu a lui, prezidentulu Zelenski feaţi ună paralelă anamisa di fostul regim comunist dictatorial al Nicolae Ceauşescu, thimilliusitu pi intimidare şi represiune, şi aţelu ditu Rusia, ʺinadicvatʺ, ʺcari kiru iţi ligătură cu realitateaʺ, ʺetimu s’curbănipsească miliuñi di sufliti, tră ş-bagă tu practico idheili nibuneşti.ʺ Emu, tru aesti condiții, Volodimir Zelenski căftă un embargo total contra ali Rusie, spunănda că Uniunea Europeană lipseaşti s-u-priveadză Moscova di iţi resurse economice şi financiare, tră s-u căndăsească, aesta turlie, s’caftă iriñea cu Ucraina şi cu tută Europa. Di itia că, tru opinia a lidirului di la Kiev, Ucraina nu easti aţelu ditu soni scupo a agresiunillei ruseşti, ditu ditu văsilia a lui până tru Republica Moldova viţină, majoritar românofonă, hiinda maş ună jgllioată. ʺTru aistu kiro, pi teritoriul ali Ucraină s’apufuseaşti mira tră tută Europa Centrală şi regiunea ali Âmarea Lae.ʺ – spusi Volodimir Zelenski, uidisitu cu atea ţi va s’dzăcă căţe ʺcathi politician a lumillei dimocratiţi lipseaşti s’ndrupască sumu iţi turlie Ucraina cu armamentʺ, iara ʺmilitarlli ruşi [lipseaşti] s’da giueapi dinintea a omlui tră infracţiunile ţi li feaţiră pi teritoriili aputrusiti ali Ucraina.ʺ



    Prezidentulu Zelenski haristusi a poporului român tră agiutorul dat a concetățenilor a lui arifugiaţi și easti căndăsitu că România va s’llia partici la znuearea ali Ucraina dupu polimu. Iar, când situaţia va s’da cali – diclară el – va ta s’aibă unu dialog cu Bucureștiul ti protecţia a comunitatillei ucrainene ditu România și a aţillei româneşti ditu Ucraina. ʺ ăndăsitu că, aşi cum noi avem ngătanu ti cetăţeañilli a dumniillei a voastri, idyea va s’aveţ ngătanu şi dumnillili a voastri di cetăţenii di etnie română.ʺ – cundille premierul Nicolae Ciucă, cari eara vinitu tru Parlamentu ta s’avdă zborlu al Volodimir Zelenski. Prezidintulu a Camerăllei a Diputațlor, Marcel Ciolacu, adusi aminti că etniţ români alumtă, tru aesti dzăli, tră libirtatea a văsiliillei tru cari băneadză şi tru cari ş’crescu cilimeañilli, aţea ţi reprezintă nai ma sinceră expresie a ligăturillei ahăndusiti româno-ucrainene. Easti inadmisibil ţi s’faţi tru Ucraina şi avem avemu borgea s’lomu meatri – spusi și prezidintulu a Senatului, Florin Cîţu.



    Autor: Roxana Vasile


    Armânipsearia: Taşcu Lala