EXPORTURI. Ministerul di Externe di București ufilisi canale diplomatice tra s’pitreacă a Kievului un mesaj că România da izini a pamporiloru ucrainene ncărcate cu yipturi s’ufilisească canalele a Dunarlui Bastroe și Chilia. Uidisitu cu Ministerlu di Externe di la București, România cilăstăseaşti s’adună unu andrupămintu internațional consistent tra s’thimilliusească ună cali di tranzit, inclusiv pe amari, tra transportul a yipturiloru ucrainene cătră văsilii terți, pe fondul a crizăllei alimentari tut ma mari diclanșate di agresiunea rusă. Niercuri, căsăbălu Istanbul ditu Turchie avu muabeţ tră turliili di diblocare a exporturlor di yipturi ali Ucraină. Conferința adună dilegațllii ditu Ucraina, Rusia, Turchia și ONU. Pamporili ucrainene poartă yipturi tru portul românesc Constanţa tra s’hibă expediate ma largu cătră lenu distinaţii ditu Europa, Africa ică lumea arabă.
PARADA La sărbătorli ndreapti cu furñia a Dzuuăllei Națională ali Franței llia parti anlu aestu oaspiț militari di tinjie ditu Europa di Est, inclusiv 12 ditu România, tru semn di pricunuştari tra eforturile alkuştoru v4silii tra s’lu veaglle flancul estic al NATO tru kirolu ali fuvirseari arusă ditu Ucraina. Uidisitu cuspusa a corespondintului Radio România la Paris, Franța va aestă turlie s’pitreacă un mesaj di unitate aliaților NATO, cum și un mesaj vărtosu di solidaritate cu Ucraina. Festivitățli s’dizvărtescu estanu sub motto-ul Partager la flame” (Ampărțări fleama) cu ună dipli semnificație: s’aducă ună tiñie al Hubert Germain, atelu ditu soni membru ali rezistență franceză contra ali ocupație nazistă cari muri estanu, și u salută fleama olimpică nintea a Agiocurloru Olimpiţi di Paris ţi va s’ţănă tru 2024. Prezidintulu ali Românie Klaus Iohannis ălli pitricu adză a prezidintului Macron ună carti di hiritiseari și urări di prucukie tra populu francez. Iohannis cundille vărtuşeamea și consecvența Parteneriatului strategic anamisa di România și Franța, construit pi valori comune și pi ună cooperare excelentă emu pi livelu bilateral, emu și tru cadrul UE și a alăntor organisme internaționale. Ambasada ali Franță la București va lu nsimneadză evenimentul pritu ună recepție, la cari va s’hibă călisiţ premierul ali Românie, Nicolae Ciuca, și Chrysoula Zacharopoulou, secretar di stat tra dizvoltare, Francofonie și Parteneriate internaționale cu Ministerul francez tra Europa și Afaceri Externe.
ARIFUGAȚ. Simfunu cu datili publicate di Inspectoratul General al Poliției di Sinuru, ñiercuri 12 ñilli di arifugaț ucraineni tricură sinurlu tru România. Ditu 10 di şcurtu, ninti di s’nkisească aputrusearea arusă, 1,55 miliuñi di cetățeni ucraineni intrară tru România, acă maş ună ñică parti aleapsiră s’armănă aoa.
Autoru: Udălu a hăbărloru
Armânipsearia: Taşcu Lala
