Văsillelu Charles al III-lea al Marii Britanii şi nicukira a lui, Camilla, fură ncurunaţ, sâmbătă, la catedrala Westminster Abbey ditu Londra, tru cadrul a unăllei ţeremonii di mari simasie. Charles al III-lea agiumsi văsille tru yismăciuni anlu tricut, după moartea a dadăllei a lui Elisabeta a II-a, la ilikia de 96 de ani. Purtânda pi anumiri firigei văsilikească, el deadi giuratlu ta s’cilăstăsească ti populu. Fu ti prota oară tru aeşţă ditu soni 70 de ani cându Regatlu Unit lo parti la ncurunarea a unui şef de stat. La ţeremonia de sâmbătă eara viiniţ cama di 2000 de oaspiţ. Anamisa di elli prezidentulu ali Românie, Klaus Iohannis, şi Custodele a Cărunăllei române, Margareta.
Klaus Iohannis spusi mari tiñie ti cllimarea faptă s’yină Londra tră festivităţli ţănuti cu furñia ancurunarillei a Majestatillei a Lui Văsillelu Charles al III-lea, ncurunari ti cari spusi că easti un momentu istoric şi ună ţelebrare a tradiţiilor monarhiillei britaniţi.
“Văsillelu Charles al III-lea easti un soţ ali Românie şi ari ună ahăndoasă akicăseari a continentului european, tut cu tut”, spusi, tu arada a llei, Custodili a Cărunăllei română, Margareta, tru mesajul dimăndatu cu furñia ancurunarillei suveranului britanic. “Ncurunarea… leagă tricutlu di prezentu pritu ună adeti istorică di ună ñille di añi. Ună adeti cari s’dusi ninti, neise, di tricu pritu polimi, cataclisme, revoluţii şi fundamentale alăxeri a lumillei. Majestatea a Lui Văsillelu Charles easti ncurunat după aproapea şasi dekenii di cilăstăseari cu vreari si tiniseari a Regatlui Unit şi a Commomwealth. Tută bana a mea fui martora a devotamentului a lui andicra di Cărună şi Naţiune”, nica spusi Margareta.
Suntu ligături vărtoasi, nu maş ca di soe, anamisa di Casa Văsilikească ali Românie şi atea ali Mari Britanie. Neise, Charles, tru harea di prinţu clirunomu, loa parti la arădzli di ngrupari a aţilui ditu soni monarhu ali Românie, Văsillelu Mihai, afendilu ali Margareta, cari dusi la Aţelu di analtu tru andreu 2017, la ilikia di 96 di ani.
Membri a comunitatillei di români ditu Marea Britanie s-adunară Londra tră s’nsmneadză, cu muzică şi măcări di adeti, dzuua a ancurunarillei. “Nă hărsimu ti năulu văsille, Charles al III-lea, şi îlu tiñisimu tră aţea că easti nai ma mari ambasador ali Românie pi mealeaguri britaniţi. Totna zbură multu muşeatu ti văsilia a noastră şi u prezentă ca hiinda fără preaclle” spusi ună româncă.
Charles vizită România, prota oară, aoa şi 25 de ani. Di atumţea, daima u feaţi, declarânda-si un admirator a văsiliillei şi maxus ali Transilvaniei, provincia istorică ţi poartă toarăli a clirunumiillei culturali a etniţloru ghirmañni ţi avea vinită aoa şi 8 secoli. Charles cilăstăsi ti ţănearea tu bană a patrimoniului cultural românesc, neise ancupără şi znui case veclli di pritu hori, pi cari li ascăpă di la aspărdzeari. Tru 2015, fu lansată Fundaţia Prinţul de Wales România, ună organizaţie caritabilă ţi ndrupaşti conservarea patrimoniului arhitectural, agricultura şi dezvoltarea durabilă tru România. Prezidenţillea lu tiñisi, tru 2017, cu Ordinlu Naţional “Steaua Româniillei” tru Grad de Mari Cruţi, ca semnu di “tiñiseari ti tută activitatea tru România şi tră promovarea a imaginillei aliştei tru lumi”.
Autoru: Stefan Stoica
Armânipsearea: Taşcu Lala
