Lumea sud-est europeană ditu prota giumitati a secolui al 19-lea s’alăxea efervescentu ditu videala-a ideilor moderne și maxusu a ideiillei națională. Europa eara tru perioada postnapoleoniană, Sâmta Alianță adrată ditu Rusia, Austria și Prusia apufusea ună nauă aradă conservatoare pi continentu. Liberalismulu a secolui 18 s’aşţa cătră darea curayiu a capitalismului naționalu și tru Europa di sud-est discursulu antiotoman agiundzea s’hibă tutu ma vărtosu.
Prota puteari ditu zona a spațiului românesc agiundzea ta s’hibă Rusia și istoria amintarillei a Româniillei moderne nu vrea s’hibă akicăsită acutotalui fără prezența și acțiunile ali Rusie. Eara ună puteare ultraconservatoare cari avea minduită s’bagă tru practico născănti idei reformatoare europene. Adetea arusă a reformelor avea ahurhită cu țarlu Petru I cel Mare (1672-1725), la ahurhita-a secolului al 18-lea. Țarlu Alexandru I (1777-1825) cilăstăsi s-reformeadză Rusia după urnekea franceză ama instabilitatea și teroarea ţi li avea scoasă tu migdani revoluția franceză ditu 1789 până tru 1795 ălu dănăsiră s-u facă. Sâmta Alianță adrată ditu aţeali trei puteri europene azvingătoari contra al Napoleon ş-avea loată borgea s’curmă iţi mindueari di cumitie şi di arăsturnari a aradăllei apufusită.
Di altă parte, spațiul românesc eara aputrusitu di secole di influența exercitată di ună altă puteari imperială idyealui ultraconservatoari, dimi di Imperiul otoman. Aoa, reformili europene acăţară nica ma greu andicra di Rusia cari avea ună elită conducătoari europenizată. Imperiul otoman avea băgată tru lucru tru Prinţipatele Române dumnii fanariote ditu fumelli gărţeşti și aesti administrații agiumsiră s’hibă tu lucru cu aruşfeti ama eara şi eara nihăirlătiţi. Elitili europeane române va s’hărnească ună retorică antiotomană sertă tu kirolu anda căfta andrupămintulu a unei Rusii aparent libearale.
Tru 1826, Rusia și Imperiul otoman avea simnată Convenția di Akkerman pritu cari eara confirmat di cătră otomani bitisita a etăllei fanariote. Ioniță Sandu Sturdza tru Moldova și Grigore al IV-lea Ghica tru Muntenia agiundzea ta s’hibă atelli doi prinţipi di orighine română cari eara tru aţeali dauă scamnuri di Iași și București. S’băga tu practico dumnillea cu mandat di 7 ani iara prinţipllii eara alepţă di adunarea a kihăeadzloru. Convenția dădea ndreptul a aţiloru dauă prinţipate române s’aibă ndreptulu ti s’facă elefteru comerț internațional. Ama tru 1828, anamisa di Rusia și Imperiul otoman nkisea polimlu dupu apofasea a otomanilor ta s’denunță convenția și ta s’nu da izini s’treacă pamporili arusi pritu strimtorli Bosfor și Dardanele. Eara un nău polimu ditu lunga succesiune di niakicăseri aruso-nturţeşti cari va s’debuteadză tru ahurhita a secolului al 18-lea. Dupu operațiunili militare, tru 1829 arușllii ies azvingători și impun a turţăloru simnarea a tratatlui di irini la Adrianopol, adzăi Edirne, cu mari implicații tră istoria a românilor. Istoriclu Constantin Ardeleanu easti profesor la Universitatea “Dunărea de Jos” ditu Galați și ngrăpsi pi largu ti importanța a fluviului Dunărea tru istoria a românilor ditu secolul al 19-lea. Și tru minduita al năsu, tratatlu di Adrianopol easti borna kilometrică 0 tru simbolistica amintarillei a statlui român modern.
“Nsimnă multu di multu tră dezvoltarea a spațiului românesc. Easti un moment di mari simasie tru istoria ali Românie, ama nu avemu tu mengă, totna, ahătu cătu ălli si cadi. Aesta tră aţea că easti momentul tru cari, di itia a akicăsearillei anamisa di aţeali dauă puteri semnatare, di itia că Principatele amintă ună libertate comercială, di itia a simarillei ti atea ţi avea numa “monopolul economic otoman”, tru spațiul românesc pitrunde capitalismul occidental. Tratatlu di Adrianopol easti un punct simbolic important tră ahurhita a modernizarillei economiţi a Prinţipatilor pritu ligarea a lor la piața globală. Fără di alta că avea ligături capitaliste și tu kirolu di ma ninti, ama ditu aesta oara, ditu 1829, Principatele Române agiungu s’hibă pi harta economică a lumillei un reper important tră comerțul cu biriketi, nu maş tră piața a Istanbulului, că ş-tră tută economie globală. Easti un momentu tru cari modernizarea economică faţi ca tută societatea să s’alăxească tru ateali dauă prinţipate, Muntenia și Moldova.”
După polimu, tratatlu di Adrianopol făţea prota mari breșă tru monopolu otoman ti earabăgatu tru Ţărilor române. Simnatu pi 14 yismăciuni 1829, tratatlu dădea ali Rusie statut di puteare protectoare ti Moldova și Muntenia. Imperiul otoman ș-ţănea ma largu statutlu di puteari suzearană, ama numata putea s’llia apofasi maş elu golu. Sinurlu di sud ali Muntenie eara apufusitu pi șenalu navigabil a Dunăllei și, multu important, porturli dunărene Turnu, Giurgiu și Brăila, aflate sumu control otoman, agiundzea diznău sumu control ali Muntenie. Libertatea nagivațiillei pi Dunăre fu pricunoscută și tră vasele comerciale muntene, iar Moldova primea ndreptul ti dezvoltari a portului Galați. Ase, comerțul cu biriketi agiundzea protlu izvuru di fonduri tră aţeali dauă stati românești.
Tratatlu di Adrianopol confirma prezența militară pi teritoriul românesc a armatăllei arusă. Până tru 1834, administrația rusă cilăstăsi s’reformeadză ateali dauă principate pripunânda un mănuclliu di reforme liberale, cu mult ma liberale andicra di Rusia propriu-dzăsă. Tru aestă noimă, primlu proiectu di constituție a Prinţipatelor fu Regulamentul organic ditu kirolu a guvernatorlui Pavel Kiseleff. Istoriţlli suntu simfuñi adză că reformili băgati tu lucru di aruși tru Muntenia și Moldova fură, pănu tu soni, maş experimenti, tra s’facă isapi ti alăxerli mutrinda ună populație. Ghini ma după 1834, românii va s4scoată tu videală că maş unu aplo experimentu poati s’hibă materializatu tru un proiect coerentu.
Autoru: Steliu Lambru
Armânipsearea: Taşcu Lala
