Ti ma pţănu di ună stămănă di la aprobarea tru Executiv, bugetlu di Stat şi aţelu a asigurărlor sociale di Stat fură adoptate di Parlamentul di București tru ună turlie multu aprukeată di varianta a Guvernului. Procedura legislativă s-dizvărti ntrăoară, cu andruparea a deputaţlor şi a senatorlor ditu coaliţia di guvernare. Fură aprukeati maş ndauă amendamente, kiro tru carir pripunirli ali Opoziţie, cari nsimna alocări suplimentare mări di fonduri, nu eara aprukeati.
Easti un buget realistu, cari elimină vulnearabilităţli ditu economie şi ahărdzasti paradz cabai ti investiţii – spunu reprezentanţăllii a partidilor aflate la Puteari. Investiţiile suntu ună prioritate, cu ună alocari di 7,2% ditu PIB, easti un buget construit pi cota unică şi nu pi impozit progresiv, iara pritu aestu buget, spun libearalii, tuţ româñilli suntu agiutaţ s’treacă ma lişoru pritu iarnă, pritu criză. Premierlu liberal Nicolae Ciucă: “Va s’avemu ngătanu ma largu tut atea ţi poati s’simneadză andruparea a mediului di afaceri, investiţii, protejarea a cetăţenilor, protejarea a cetăţenilor vulnearabili.”
Easti un buget echilibrat, un buget cari ari ună creastire economică şi un deficit tru scădeari, un buget pritu cari sunt prognozate investiţii recordu, spunu și social-democrațlli. Suntu pruvidzuti hărgi sociale tră persoanele vulnearabile, compensări tră păhadfzlli la energie, programe tră tiniri, ama și creastiri la tiñiili di cafi mesu şi pensii, adavgă elli. Liderul PSD, Marcel Ciolacu: “Avem un buget, tră prima oară adratu ninti di bitisita-a anlui, aţea turlie că, ditu aestă oară, tuti autorităţli locale pot să-şi pruveadă investiţiile, ahurhinda cu 1 di yinaru.”
Ditu Opoziție, lucărli s’vedu altă turlie, reprezentanţălli a partidilor di aaoa cutugursinda bugetlu, pi cari lu yilipseaşti ca hiinda cu ixiki di vizie și nirealistu. “Easti un buget cari nă arădi, tamam cumu nă arăsi anlu ţi tricu, când băgatu idyea, cumu tru anlu aestu, venituri supraevaluate tra s’alasă loc a născăntoru creastiri exagearate di hărgi”, spun atelli di la USR. Liderul USR, Cătălin Drulă: “Un buget arădocicu, inflaţionist cari va s’bagă gaz pe foclu a scunkerloru cari s’facu dzuuă di dzuuă. Votămu cu seati contra a aluştui buget a specialilor.”
Ditu videala ali AUR, actualu buget nu easti unu di dezvoltare şi redresare a văsiliillei, ama easti un buget di supravieţuire, un buget di anvăleari a deficitlui. Liderul AUR, George Simion: “Npidipsimu s-dăm nica ndoi lei la pensie, un leu la tiñia di cafi mesu şi să znuimu ditu 100 di apunţă, ună ică dauă. Niţiun leu tră reindustrializarea a văsiliillei, niţi leu tră năi facilităţ energhetiţi.”
Bugetlu di Stat tră anlu yinitoru pruveadi ună creastire economică di 2,8% ditu Produslu Internu Brut şi ună rată anuală a inflaţiillei di 8% la bitisita a anlui 2023. Deficitlu public va s’hibă tru scădeari, di la 80 di miliardi di lei (aproapea 16 di miliardi di euro) tru aestu an la 68,2 miliardi di lei. Suntu pruvidzuti inclusiv criştearea a pensiilor cu 12,5%, creastirea a tiñiillei di cafi mesu minimă pi economie la 3.000 di lei (aproapea 600 di euro) şi darea di agiutoari financiare ti persoanili cu amintatiţi ñiţ.
Autoru: Corina Cristea
Armânipsearea: Taşcu Lala
