Radio România Internațional

Tag: filmu

  • „Noi contra noastră”, nai ma bunu filmu a Secţiunillei România la Astra Fil

    „Noi contra noastră”, nai ma bunu filmu a Secţiunillei România la Astra Fil

    Documentarlu regizat di Andra Tarara, “Noi contra-a noastră” amintă marli premiu a secțiunillei românești a aţillei di-a 28-a ediție a Astra Film Festival (5 – 12 yismăciuni) . Motivația-a juriului: “Tră ună analiză emoționantă și tiñisită a ligăturăllei a autoarăllei cu tatăl a llei și tră autenticitatea a dialoglui a loru ti lăngoarea cari zñiipsi bana a dolliloru. Juriul tiñisi colaborarea anamisa di doi cineaști ţi tănu di dauă bărnuri ahoryea și turlia tru cari aţelli doi aflară idyea cali di comunicari pritu limbajlu cinematografic”.



    Lungmetrajul di dibut al tinirăllei cineaste Andra Tarara, “Noi contra-a noastră”, easti constituit ditu unu şingiru di dialoguri ţi zuyăpsescu ligătura tată – hille, marcată di ună pasiune comună și di ună cutulburare psihică. Muabeatea a aţiloru dauă personaje agudeaşti subiecte catacum niaxizearea di comunicari, educația și dizvoltarea personală ică stigma a lăngorloru mintale. Cathi unu şi spuni pirmitusearea işişi — pănu tu soni perspectiva işiş ti idyili evenimente — emu cu agiutorlu a zboarăloru, emu cu agiutorlu a camerăllei di filmat. “Noi contra noastră” avu premieara mondială la Festivalul Internaţional di Filmu Documentar Jihlava 2020, Cehia, și fu prezentu la Les Films di Cannes à Bucarest 2020. Tru aestă veară fu aleptu tru arada a ma multiloru festivaluri, ntră cari Moldova Film Festival și Moscow International Documentary Film Festival DOKer, feaţi parte ditu competiția Festivalului Ceau Cinema! di Timișoara și lo parti tru secțiunea “Dzălili a Filmului Românesc” a Festivalui Internațional di Film Transilvania (TIFF). Tu kirolu anda s’documenta tră “Ună moarte tru familia mea”, primlu filmu realizat tru harea di regizoare, nominalizat tru 2019 la Premiile Gopo, categoria Tiniră speranță, Andra află tru arhiva a familiillei ma multe casete video cu filmări fapti di afendilu a llei, Ion Tarara. Ași s-amintă “Noi contra-a noastră”.



    Andra Tarara: “Ași agiumşu la pirmitusearea aesta, anda mutriiu pritu arhiva di film a familiillei. Anda aflaiu aesti casete VHS, dukiiu că tata feaţi lucărlu aestu ti nipistipseari di arhivari a pirmitusearillei a noastră di familie și că io iesu tu migdani dipu multu tru eali. Ti atea, subiectul principal cari transpare ditu tuti aesti imagini și filmări easti ligătura a noastră și minduiiu că va s’hibău di sinferu s’acăţămu tu debate aestu lucru, turlia tu cari lucreadză tră tata exprimarea pritu film și cum u loai mini mirakea aesta di la elu. Ași ahurhi filmul, ca un exercițiu di conectare anamisa di noi și di explorare a ligăturăllei a noastre pritu filmu. Și pirmitusearea agiundzi s’hibă tutu ma complexă, tră aţea că tata avu mari miraki ti film, avu șansa s’lucreadză tru film și, ti amărtie, nu putu s’ducă lucărlu ma largu di itia că nu avu resurse și părințăllii a lui nu eara simfunu cu aesta. Di altă parte, io avui parti di ună ndrupari pănu di mardzină, ca ună turlie di compensare, di revanșă andicra di imposibilitatea alu afendi a meu ta ş’ducă mirakea ma largu. Ași că pirmituserli ţi amintară cu filmulu eara tru familie, tata eara hăzări să zburască ti eali.”



    Prin documentarlu “Noi contra noastră” Andra Tarara aprăftăseaşti s’hibă avdzătă şi boatea a aţiloru pi cari societatea îlli stigmatizeadză di itia a problemelor di sănătate mintală și s’aducă tru menga publică ună lăngoari ti cari să zburaşti dipu pțănu.



    Andra Tarara: “Tata feaţi s’hibă multu ma prezentă tru filmu lăngoarea. Multu di multu vru ta şi spună pirmitusearea și, ună turlie, miza a lui ligată di aestu filmu fu că pirmitusearea-a a lui s’hibă avdzătă tru idhea ta s’agiută și alță oamiñi cari trec prin idyiulu lucru. Filmul s-amintţ până tu soni ditu aestă negociere, dimi io yineamu cu agenda mea, avem naetea ta s’adaru ună tadi turlie di filmu, iar el avea vreara ta şi spună pirmitusearea. Eu ălli spuşu cata cari easti minduita a mea ligată di film, ama și el s-ndreapsi multu ghini ninti di filmare, ș-feaţi planuri, s-mindui ti atea ţi avea ti spuneari. Așa că mini ca autor vui cătivărăoară sentimentul că-ñi ascapă didipu lucărli di sum control și născănti ori reacțiile a meali ditu film născănti ori suntu fuviroasi. Tu soni, aşi s’amintă “Noi contra-a noastră”. Ditu tensiunea anamisa di aesti dauă perspective, a mea și a lui, anamisa di aesti dauă agendi, ditu turlia tru cari cathi unu di noi bănă ahoryea, ama deadunu idyea catandisi și u spusimu pritu zborlu a nostru. Tatăl meu zburaşti dipu multi ti stigma ţi u duki, pirmitusi multu ti aesta, că oamiñilli ălli stigmatizeadză pi aţelli lăndzidz și tră atea că nu cunoscu persoani tu catandisea aesta.”



    “Pritu ună pirmituseari intimă, documentarlu “Noi contra-a noastră” dişcllidi, dimecu, ună muabeti ţi easti ananghi ti sănătatea mintală, ti problemele pi cari di nai ma multi ori nu li pricunuştemu ică nu le scutemu tu videală di cu kiro, ti turlia tru cari putem s’avemu ligătură cu aprukeaţlli diagnosticaț, cum și ti existența ică ananghea a ma multiloru platforme di suport. Vremu s’yinimu dinitea a aţiloru cari va s’veadă filmul (și nu maş), ta s’acătămu ma lişoru tu isapi aesti subiecte, emu pritu experiența personală ali Andră și a tatălui a llei, ama și cu agiutorlu a unei parei di psihologi și psihiatri, cari viniră deadunu cu noi tru etapa di distribuție a filmului” – declară Anda Ionescu, producătoari, Tangaj Production.



    Autoru: Corina Sabău


    Armânipsearea: Taşcu Lala

  • Otto Barbarlu, nai ma bunu lungmetraju românescu la TIFF, tru cinematografi

    Otto Barbarlu, nai ma bunu lungmetraju românescu la TIFF, tru cinematografi

    “Otto Barbarlu”, debutlu tru lungmetraju al regizoarăllei Ruxandra Ghiţescu, poati s’hibă vidzutu tru cinematografili ditu văsilie ditu 24 di yismăciuni. “Otto Barbarlu” avu premiera mondială tru competiţia ufiţială a aţillei di a 26-ţa ediţii a Festivalului Internaţional di Film di Sarajevo și fu aleptu nai ma bunu lungmetraj ditu secţiunea Dzălili a Filmului Românescu la TIFF (Festivalu Internațional di Filmu Transilvania).


    Filmul ari tru ţentru un adolescentu punk tru ilikia di 17 ani cari s’ampuliseaşti cu moartea a vrutăllei. Fciciorlu agiundzi captiv tru ună parei slabă pseftă adrată di părinţă, pap, mama a vrutăllei a lui şi ancheta dizvărtită di serviţiili suţiali. Ta s’armănă tru bană, Otto lipseasti s’alumtă cu sentimentele şi căbatea.


    “Andrupătu di mutrita străxită ali Ruxandra Ghițescu (tut ţi-și va mai multu un personaj aflat tru ananghie), Otto easti nai ma atașant protagonist di film românesc a añiloru ditu soni” scrie criticul di filmu Victor Morozov, iara Ruxandra Ghițescu ari nădie că “Otto Barbarul” easti un filmu cari van a haristusească emoțional. Filmul nkisi di la un articol di aoa şi ndoi ani cari spunea pirmitusearea al Octavian Albu, regizorlu muzical a filmului și autorlu a coloan4llei sonoră deadunu cu trupa Cardinal.



    Ruxandra Ghițescu: “E, ună turlie tru cftărli a meali ta s’aflu ună ligătură dramaturgică cu ilikia adolescențăllei, aflaiu un articol ti Octavian Albu, cari fu spusu cu părnoañea Otto Barbarul și ñ si s-păru un4 andamusi multu hărăcoapă. Hiinda solistu tru ună formație punk, cu tută arhitectura exterioară a culturăllei punk, ñi si păru că Octavian antrupeadză marginalitatea a unei ilikie multu anvărligată și tru raporturile sociale, și tru film, și tru literatură. Octavian Albu fu consilier ditu ahurhită pi partea di muzică, andrupa echipa a noastre ca regizor muzical și compusimu deadunu cu trupa Cardinal mari parti ditu coloana sonoră, iara deadunu aleapsimu și melodiile ditu film cari sunt priloati di la alti trupi punk. Pot să spun că ditu articolul cari inspiră pirmitlu a filmului armasi numa, creasta și geaca. Easti una ficționalizare fără niţi ună turlie di legătură cu bana al Octavian. Dimecu, noi nă and4musimu dupu ndoi añi după ţi aflămu articolu, cându Otto avea umplută 23 di ani, era studentu Londra, și el fu simfunu s’ufilisescu articolu ca izvuru di inspirație. Añi si s’păru că s-hărsi multu di multu că agiumsimu s’adrămu aestu film, easti ună persoană pozitivă și contribuția lui mi agiută multu di multu, nica şi cu feedback pi scenariu.”



    Ruxandra Ghiţescu ș-pripusi s’facă un filmu ti adolescență ca ilikie a tumultului emoțional și a singuramillei, ilikie tru cari muzica gioacă un rol esențial. Tru idyiulu kiro, Otto Barbarul easti un film cari lă zburaşti emu a adolescenților emu a părinților, ună căliseari tu dialog și debate ti depresie și consecințili aliştei.



    Ruxandra Ghițescu: “Ditu ahurhită vrum s’adramu un filmu mizânda ma multu pi afectu andicra di intelect, maxusu că ari ligătura cu ilikia aesta iu tu amprotusa suntu emoțiile și mai puțin calea multu ndreaptă a raționalui, la cari apelăm ma amanatu tu bana. Nu știu cât di multu fu ună construcție, fu ma multu una exteriorizare a bănaticlui interioru. Otto easti un personaj multu critic, introvertitu, cari zburaşti multu puțănu, și atuţea interacțiunile cu alanţă suntu rezultatlu a emoțiilor și a bănărloru a lui interioare. U externalizaiu tut imnaticlu emoțional interior a personajlui tru a lui len turlii di relații: relația cu părinţăllii, cu mama a vrutăllei, cu materialili video alăsati di vrută, ama maxusu cu muzica. Iara aestă ligătură cu muzica u dizvultămu multu di multu tru kirolu a montajului și cu pregătirea a coloanăllei sonoră, căţe vrumu multu di multu s’aibă un ritmo idyealui cumu punk-ulu. Mi hărsescu multu că acăţămu unu kiro tru cari Otto va s’hibă tru cinematografe și va s’avemu ligătura cu publiclu, tăş tora dukescu că adrămu un filmu și că fimul aestu și-agiumsi scupolu. Tutu anlu ţi tricu, cu tuti restricțiile di itia a pandemiillei, tru cari cinematografili ahătu lişoru ncllisi şi tru cari experiența aesta cinematografică fu abandonată ahât di lişor, fu multu durerosu tră mine și minduescu că și tră mulță alțăllii. Ași că mi hărsi experiența a aţiloru ditu soni festivaluri, di contactul cu publiclu și di experiența tru sala di cinema, dinintea a unui ecran.”



    “Ruxandra Ghițescu adara ună masti tandră, cari nu easti cu axiili di surprizi și cumăţ spectaculoase di actorie” scrie Georgiana Mușat tru revista Acoperișul di sticlă dispre filmul produs di Alien Film tru coproducție cu Polar Bear și Alien Films Entertainment. Filmul cari llia pi napandica sticlu di bana a unlui adolescent punk tru ilikia di 17 ani, tru cari aestu s’ampuliseaşti cu chirearea a vrutăllei a lui ălu ari tu distribuție pi Marc Titieni, Adrian Titieni, Ioana Bugarin, Ioana Flora, Mihaela Sîrbu, Iulian Postelnicu, Ana Radu, deadunu cu llirtatlu Constantin Drăgănescu. Ana Drăghici simneadză imaginea iara Dana Bunescu montajlu. Producătorllii a filmului sunt Iuliana Tarnovețchi și Oana Prața, iara Anda Ionescu easti producător delegatu.



    Autoru: Corina Sabău


    Armânipsearea: Taşcu Lala