Aflat tru ună vizită tru România, comisarlu europian tră lucru şi ndrepturi sociale, Nicolas Schmit, avu muabeti cu autoritățile tră misurli pi cari Bucureștiul lipseaşti s’li llia tră s’combată urfañea tru arada populaţiillei, ama şi tră impactul a polimlui ditu Ucraina ti economia-a Europăllei. Nicolas Schmit “Prota ş-prota, lipseaşti s’nă a’asiguripsimu că aest polimu nu va s’ducă la ună nauă criză economică tru Europa. Aestu easti un lucru multu important. Sigura că avem unu şingiru di lucri nesigura, păhălu energiillei, lucre ţi potu s’aibă influenţă ti niscănti sectoare. Ti lliiaharaua tră România, voi hiţ tru catandisea tru cari hiţ aproapi autonomi, hiţ tu ună catandisi energetică multu bună, aţea ti easti multu cu hairi”.
Diadunu cu premierul Nicolae Ciucă, comisarlu feaţi isapi, prota ş-prota ti apanidisea a UE la criza generată di agresiunea militară rusă. Şeflu a executivului părăstisi strategia României tră asigurarea indipendinţăllei energhetiţi prin udilisearea-a energiei nucleare, dizvoltarea capacităţii di produţiri a energhilliei regenearabile şi exploatarea năilor dzăcăminte di gaze naturale offshore. Di altă parte, Nicolas Schmit cundille hairea a eforturilor autorităţilor române ta s’amintă cama di giumitati di milion di arifugaţ. Tutunăoară, el exprimă agiutorluy a Comisiei Europine tră accesarea ntrăoară a fondurilor ţi suntu la dispoziţia statelor membre și diadi asigurări că aeastea va s’hibă suplimentate cu năi resurse.
Bruxellesul va s’ndrupască guvernul român tru eforturile ta s’lli-agiută tinirlli ta ş’află unu locu di lucru, spusi comisarlu, după andamasea cu ministrul Lucurlui, Marius Budăi. El spusi că aestu lucru poate s’hibă adratu pritu implementarea a unei iniţiative comunitare, cu numa “Garanţia tră Tineret” şi accesarea a fondurilor disponibile. Uidisitu cu năsu, easti importantă și implementarea “Garanţiei tră cilimeani” di itia că ari ună problemă salamai cu urfañea tru România, maxusu tu arada a cilimeanilor. Nicolas Schmit “S’lă da a tutăloru cilimeanilor oportunităţ ma bune, s’hibă mutriţ ma ghini, educaţie, ună nutriţie ma bună. Zburămu tutunăoară, şi tră ftuhia tu arada a auşloru. Aoa zburămu tră pensii şi tră combaterea ftuhiillei”.
Tu arada a lui, Marius Budăi cundille că easti ananghi ca plafonul di 9,4% ditu PIB cari limitează hărgili cu pensiile, pruvidzutu tru PNRR, s’hibă flexibilizat, di itia că ncadrarea a pensiilor tru aestu proţent duţi la ftuhia a populaţiillei.Marius Budăi: “Escu simfunu, şi u spuş şi a domnului comisar, iţi reformă cari s’yină tu ghineaţa a statului român şi cari s’hibă simfun cu tutu ţi nsimneadză pruvidirli ditu tratatele Uniunii Europeane. Și noi himu cabaia ataşaţi ti aestu proiect european, ama nu va s’bag vărnăoară vula pi ună reformă cari s’ţănă tu iyea scară I s’ducă la urfănipsirea a cetăţenilor români”. Tra s’ndrupască România tru contextul a crizăllei di la sinurlu cu Ucraina, eara vinit tora ma ninti la București comisarlu european tră afaceri interne, cum și comisarlu tră agiutor umanitar şi kivernisearea a crizelor.
Autor: Daniela Budu
Armânipsearia: Taşcu Lala
