Prezidenta a Parlamentului European, Roberta Metsola, năpoi spusi că România easti ndreaptă s’aderă la Spaţiul Schengen şi va u facă tu şcurtu kiro. Tru un zboru ţănut tru plenlu a Parlamentului d Bucureşti, ea cundille că intrarea tru aestu spaţiu nu easti ună dhoară, ă un ndreptu amintatu şi adusi aminti di agiutorlu datu di România tră arifugaţlli ucraineni. “România va s’adera la Spaţiul Schengen tru şcurtu kiro”, adăvgă ea. “Nu trădzeţ măna di la Europa”, nica spusi Roberta Metsola: “Lă spuş a liderlor că aesta fu nai ma urutu imnaticu ţi putea s’lu vulusească. Minduescu că apofasea ti amănari fu alătusită.”
România ari, ma largu, scupolu strategic naţional di aderari la Spaţiul Schengen, iara niaprukearea a llei nu easti ntimilleată, spuni și prezidentulu interimar a Senatlui, Alina Gorghiu (PNL): “România easti un partener di pistusini pi car tuti statili europeani pot s’bagă besă. Ti aţea, vruţ români, rezultatlu a votlui ditu 8 di andreu easti unu acutotalui injustu. Poziţia ali Austrie fu acutotalui inadmisibilă.”
Tu arada-a lui liderul a Camerălleiei a Deputaţlor, Marcel Ciolacu (PSD), spunea că nu lipseaşti s’keară pistipsearea. Amintămu neise tiñisearea a partenerilor a noştri europeni, pritu turlia tru cari nă feaţimu borgea tru prima linie ali apărarii şi securitatillei ama şi unitatillei europene, lugurseaşti năsu: “Aestu eşec di etapă nu poati s’hibă definitoriu. România ma largu va s’hibă parti ali soluţie europeană, ama, tru idyiulu kiro, deadunu cu partenerllii a noştri, va s’himu nica ma apufusiţ s’aşţămu rezultatlu aluştui vot ţi nu easti tiñîsitu.”
Spaţiul Schengen va s’agiungă ma vărtosu, ma sigura şi ma tru prucukie pritu integrarea ali Românie, spuni premierlu Nicolae Ciucă. El spusi că România va s’armână angajată şi cu ună atituditue cât ma constructivă tra s’bagă tru lucru aestu scupo.
București, Roberta Metsola s-andămusi şi cu prezidentulu Klaus Iohannis. Şeflu a statului şi spusi nădia că România va s’intra tru Schengen anul yinitoru: “După părerea a mea, easti cumu ţi s’hibă multu ayoñea. Până tru 15 di yinaru easti zori s’pistipsimu că vas ă zburască ţiva şi tru dauă stămâni nu minduescu că va s’ndreagă problema ti abordarea austrieacă şi problema ti abordarea olandeză andicra di Bulgaria. Lipseaşti s’akicăsimu toţ, deadunu, că aesti chestiuni lipseaşti s’hibă ndreapti ninti să s’voteadză nica nă oară tru Consiliul JAI.”
Muabeţli di la Pălatea Cotroceni nica avură tru scupo unitatea năuntrulu ali UE tru contextul a polimlui ditu Ucraina, sancţiunile la adresa ali Rusie, ama şi aţelu ditu soni căvgă di corupţie ditu Parlamentul European ligat di aşi spuşlli păradz durusiţ di Qatar şi Maroc a născăntoru ufiţialli europeni tră s’influenţeadză apofasi a instituţiilor europene. Tru context, Roberta Metsola cundille că va s’cilăstăsească tra s’ndreagă alathusili şi tră s’aibă diznă pistusinea ţi s’kiru.
Autoru: Mihai Pelin
Armânipsearea: Taşcu Lala