Tag: protestu

  • Ma mărli evenimenti a stâmânâllei ți tricu 07.07 – 13.07.2024

    Ma mărli evenimenti a stâmânâllei ți tricu 07.07 – 13.07.2024

    Ucraina, punctul chentral a summitlui aliat di Washington
    Ținți lideri dit NATO, prit cari prezidentul american, Joe Biden, ş-ațel român, Klaus Iohannis, simnarâ, la summitlu aliat di Washington, unâ declaraţie tu cari âși llia borgea sâ-lli da ali Ucrainâ sistemi di apârari aerianâ Patriot. Kievlu va s-poatâ s-filiseascâ, ași, baterii Patriot donati di Statili Uniti, Ghirmânie şi Românie, la cari s-adavgâ componenti dati di Vâsiliili di Nghiosu şi un sistem donat di Italie.
    „Adrămu tuti aesti lucri: andrupâm Ucraina, donăm Patriot, agiutăm Moldova, agiutăm ş-alțâ ditu reghiuni, că putemu ș-că ași minduim că easti ndreptu s-adrămu”, dzâsi prezidentul Iohannis. Uidisit cu spusa a lui, România s-alâxi dit un crat ți plâcârsea sâ-lli si da agiutor di ițido turlie tu un crat ți ari forţa, energhia ş-capațităţli ta s-exportâ securitati tu tutâ reghiunea.
    Tu plan bilateral, Klaus Iohannis ş-omologlu a lui ucrainean, Volodimir Zelenski, simnarâ, Washington, unâ achicâseari di lucru deadun tu dumenea a securitatillei. Easti un documentu politic ți sistematizeadzâ lucurlu ți s-fați chiola anamisa di aesti dauâ vâsilii tu dumenii ahoryea ș-ari și lucri ligati di borgea ți ș-u lo Kievlu di duțeari ma largu a reformilor di cari easti ananghi tu calea a lui evropeanâ şi evroatlanticâ, di tiñisearea a ndrepturlor a minorităţlor naţionali, cata cum și di lucru deadun ti alumta contra a criminalitatillei di la sinur. Agiutorlu ti Ucraina fu protlu punctu pi aghenda a summitlui NATO. „Avem tu umuti sâ silighim un pachet di nai pțân 40 di miliardi di evradz ti anlu ți yini, a dapoaia s-u țânem asistenţa di securitati la un livel bun, ș-ași Ucraina s-poatâ s-azvingâ”, ș-loarâ borgea vâsiliili membri.

    Protestu dișcllisu, protestu ascumtu
    Tu plan internu, stâmâna ahurhi cu un protestu altâ turlie, andreptu di contabili ş-economişțâ cu numa „Fârâ haos tu leghislaţia fiscalâ”. Bucureşti ş-tu alțâ câsâbadz, partițipanţâlli scoasirâ tu padi actili leghislativi şi misurli fiscali ți li luyursescu că aduc zñie, câțe agudescu cathi antreprenor, economistu, contabil cata cum ş-contribuabil dit Românie. Protestatarlli dzâc că bâgarea a niscântor mecanismi cum suntu e-Factura ică e-TVA, creaşti, dealihea, birocraţia. Protestul a contabililor fu unlu spus di cu chiro.
    Nu idyealui s-feațirâ lucârli la Aeroportul Internaţional Otopeni, iu dzăț di azbuirări interni ş-externi ali companie naţionalâ TAROM furâ anulati di cara unâ parti dit piloţ s-aspusirâ niputuț ti azbuirari. Dapoaia inshi tu migdani că eara unâ turlie di grevâ ascumtâ, ahruhitâ dinapandica, ți adusi zñie a pasagerilor ș-dusi la mări cheardiri ti companie. Azbuirărli ahurhirâ diznău daua dzuuâ, dupâ ți cumândârsirea TAROM simnă unâ achicâseari ti lucri ligati di tiñia di cathi mes cu personalul navigantu.
    Comisarlu evropean ti transporturi, Adina Vâlean, dzâsi că criparea di la Tarom nu easti ti bun, anda compania s-hârseaști di un agiutor di la crat aprucheat di Comisia evropeanâ. TAROM ari, cathi an, cheardiri mări finanțiari, iara analişțâlli s-antreabâ naca copuslu a cratlui ta s-u andreagâ și s-u ascapâ firma nu s-duți pi vimtu.

    Problemi tu transporturi
    Urdinarea pi Calea Nționalâ DN7 Valea a Oltului, arterâ di mari simasie ți treați pritu Carpațlli Meridionali ş-asiguripseaști ligâtura cu tronsoanili ditu chentru ș-ascâpitatâ s-ancllisirâ, ti un mes, dzuua maș, ta s-poatâ s-talli pâduri ti adrarea ali geadei Sibiu-Piteşti, geadei ți easti aștiptatâ di cama di 3 dețenii. Dânâserli âlli cârtescu transportatorlli ș-nu maș elli, iara zñiili nu amânarâ s-veadâ: ma multi codz s-adrarâ pi calea para urdinatâ DN1 anamisa di Ploieşti – Braşov. Iara aesta nu easti tut anda zburâm di transporturi: Apuntea a Suțatâllei Giurgiu-Ruse pisti Dunâ, intră, ñiercuri, tu mirimitisiri, pi partea vâryâreascâ, ti un chiro di doi añi. A țetâţeñilor româñi lâ dăm urnimia s-filiseascâ ș-alanti puncti di trițeari a sinurlui cu Vâryâria, locu iu vor s-agiungâ turișțâlli româñi, ama și vâsilia prit cari s-treați anda vrei s-nedz tu Gârție i tu Turchie, dauâ destinaţii mări tu chiro di vearâ.

    Unâ ordonanţâ ti cari s-feați multâ lafi
    Chivernisea alâxi, gioi, ordonanţa di Urghenţâ tu ți mutreaști testarea antidrog a şoferlor, dupâ ți actul normativ fu multu câtigursit di suțietatea țivilâ. Şoferli ți sunt aflaț pozitivi la testari i ți nu vor s-adarâ testarea lâ si llia carnetlu, ama pot sâ-și lu llia nâpoi tu 3 dzâli, maca laboratoarili di mediținâ legalâ nu da, tu aestu chiro, rezultatlu preliminar a analizilor di sândzâ. Unâ suțatâ neguvernamentalâ câftă anularea a ordonanţâllei ti testili antidrog, că taha ari pruvuderi abuzivi, cata cum ș-rezultati pozitivi di cara oamiñilli llia yitrii ti arâțeari/aremâ.

    Dalgâ di câñinâ pisti Românie
    Meteorologhilli româñi feațirâ tâmbihi că, tu bitisita a stâmânâllei, va s-facâ nai ma teslu cod aroşu di câñinâ di pânâ tora, tu trei cirecuri/carturi dit vâsilie. Ninti di bitisita di stâmânâ furâ ținți dzâli cu para mari câldurâ, cu temperaturi ți alinarâ pânâ la 39 di gradi și va s-facâ ș-di aoa ș-ninti, uidisit cu prognozili, alti trei dzâli cu temperaturi extremi, ți va s/-treacâ di 40 di gradi. Chivernisea lâ câftă a autoritățlor chentrali şi locali s-hibâ etimi s-intervinâ cu hâiri atumțea cându va s-aibâ vârâ stevlâ/ananghi.

    Ahurhitâ bunâ tu competiţiili/astrițerli ditu intercluburili di fotbal
    Dupâ un evropean bun adrat di naţionala ali Românie, menga a microbişțâlor s-mutâ câtâ echipili di club acâțati tu competiţiili/astrițerli continentali. Iara anchisita di sezon fu bunâ: Campioana FCSB (București) u azvinsi campioana San Marino, Virtus, cu 7-1, marţâ, tu xinurâ, tu prota manşâ dit protlu tur preliminar ali Ligâ a Campioñilor, iara echipa ți lo Cupa, Corvinlu Hunedoara, azvinsi, tut tu xinurâ, cu 4-0, vițecampioana şi amintâtoarea ali Cupâ ali Ungariei, Paksi, tu prota manşâ a protlui tur preliminar ali Europa League. Ma s-adarâ niscânti calificări, FCSB va s-adunâ tu doilu tur preliminar cu Maccabi Tel Aviv, dit Israel, iara Corvinlu va s-alumtâ cu formaţia croatâ Rijeka.

    Autor: Ștefan Stoica
    Apriduțearea: Aurica Piha

  • Ma mărli evenimenti a stămânăllei ţi tricu 07.05 – 13.05.2023

    Ma mărli evenimenti a stămânăllei ţi tricu 07.05 – 13.05.2023

    Nicurarea a hărgiloru publiţi


    Coaliţia la guvernare tru România apufusi turlia tru cari va s’hibă scădzuti hărgili publiţi, lucru ţi lu caftă deficitul bugetar dipu mare, iara executivul lu transpusi tru ună ordonanţă di urgenţă adoptată viniri. UIdisitu cu aesta, instituţiile di stat lipseaşti să scadă cu 10% hărgili cu bunuri şi serviţii, va s’hibă ñicurati cu 50% ipotisili di consilieri tru aparatul dimnitarilor publici, iara ună pirsoană nu va s’poată s’aibă ma multu di dauă mandate tru consiliile di administraţie a companiilor naţionale ică tru alti instituţii publice. Tutunăoară, suntu curmati, tu aestu an, angajările tru instituţiile şi autorităţile publice, cu excepţia domeniilor a sănătatillei şi educaţiillei. Ditu apriliu 2020, România easti tru procedură di dificit excesiv, di itia că aestea năstricură tru 2019 praglu di 3% ditu PIB apufusitu tru cadrul Pactului di Stabilitate şi Creastire. Ahurhinda cu anul 2021, dificitul bugetar intrat pi ună traiectorie di ajustare tru linie cu recomandarea UE, ama easti nica pi un nivel multu analtu. Misurli pruvidzuti tru ordonanţa adoptată viniri va ss’aducă economii la buget di pisti 5 miliardi di lei, echivalentul ti 1 miliardu di euro.



    Protestu a lucrătorloru ditu nviţămintu


    Lucrătorlli ditu nviţămintu ndreapsiră, tu mesea ali stamăna ţi tricu, un marşu di protest, pi calea ţi leagă sediul Guvernului di Parlament. Loară parti profesori şi dascalli, pirsonal nididactic şi didactic auxiliar. Protili fediraţii sindicale ditu domeniu caftă criştearea a tiñiiloru di cafi mesu tu simfunie cu importanţa socială a lucărlui faptu şi vor ca tiñia di cafi mesu a profesorului dibutant s’hibă nai ma pţănu isa isa cu atelu di mesi brut pi economie. Protestatarlli caftă nica şi indixarea anuală a tiñiiloru di cafi mesu cu rata ali inflaţie, păltearea a oariloru suplimentare fapti di pirsonalu didactic auxiliar şi nididactic şi darea a sporurilor tră condiţii di lucru a pirsonalului ditu nvăţământu. Pi lista a căftărloru nica suntu şi dicontarea navetăllei, păltearea a indimnizaţiillei di instalare, darea a concediului di adyi suplimentar şi compinsarea financiară a concediului ţi nu fu faptu. Sindicatili ditu educaţie caftă tutunăoară, creastirea anuală a investiţiilor tru nvăţământ tră făţeari cama bunu baza materială şi infrastructura. Eali fuvirsescu cu diclanşarea a grevăllei ghenerală.



    Nomurli ali educaţiei, adoptate di diputaţ


    Diputaţlli români votarăm pacheta di nomuri ti cari iniţiatorul, ministerul ali Educaţie, spuni că agudwscu problemili croniţi a sistemlui, ntră cari aţeali cama cu zori hiinda abandonul şcolar şi analfabetismul funcţional. Uidisitu cu ministrulu Ligia Dica, investiţiile, prioritizarea a zonilor difavorizate la alocările bugetare şi misurile cari mutrescu hăirlătica tu tut kirolu a imnaticlui educaţional suntu sturlli a aliştei pachetă legislativă. Tru ţi mutreaşti nviţămintulu preuniversitar, ari căbili că liceele s’aleagă tră un examen suplimentar, pi ningă evaluarea naţională, cu scupolu ti acăţarea giumitati ditu locuri. Tutunăoară, religia agiundzzi s’hibă disciplină opţională la bacalaureat, easti lărdzitu programlu di rechizite tră elevlli ditu medii difavorizate şi easti băgatu un plan naţional di alumtă contra a prişcăviillei tru şcolliuri. Suntu alăxeri şi tru nviţămintul universitar. Nu dipu tu soni, suntu pruvidzuti amendză mări tră pirsoanele cari ancupără ică vindu lucrări ştiinţifiţi, refearate, lucrări tră examenele di evaluare, catacum şi di finalizari a studiilor universitare di licenţă, masterat şi doctorat.



    România, sturu a securitatillei cibernetică europiană


    Bucureşti fu dişcllisu, stămâna aesta, năulu Centru europian di compitenţe tru materie di securitate cibernetică. El ari tu scupo s’ndrupască inovarea şi politica industrială tru domeniul a securitatillei cibernetică şi s’dizvoltă şi s’coordoneadză proiectele UE tru materie di securitate cibernetică. Centrul va s’kivernisească proiecte mutrinda centrili di opiraţiuni tră securitate, tru cadrul a pripunirillei Comisiei di instituire a unlui scut cibernetic europian, şi va s’lucreadză deadunu cu un şingiru di centre naţionale di coordonare tru scucpolu ti thimilliusearea a unlui ecosistem tră inovare şi compititivitate tru materie di securitate cibernetică tru tută UE. Comisarlu tră piaţa internă, Thierry Breton, declară că securitatea cibernetică easti ună prioritate esenţială, iara protejarea a suvearanitatillei digitală a Uniunillei Europiană caftă gaereţ deadunu. “Centrul europian di compitenţe tru materie di securitate cibernetică adună resurse şi expirţă di nivel analtu ditu tută UE tră s’dizvolta soluţii inovatoare la fuvirserli cibernetice şi tră s’crească rezilienţa la atacuri. Lucrânda deadunu, putem s’construimu ună lume digitală ma sigura şi ma securizată tră tuţ europiañilli”, cundille oficialu di Bruxelles.



    Triplă yiurtuseari: Dzuua a Indepindenţăllei, Dzuua a Regalitatillei şi dzuua a Europăllei


    Pi 10 di mai, România nsimnă, pritu ţeremonii militare şi religioase, Dzuua Independenţăllei Naţională. Tru 1877, pi 10 di mai, Principile Carol I simnă Proclamaţia di Independenţă a Româniillei andicra di Imperiul Otoman, conferinda-lli ase puteari di nomu. Patru ani ma amănatu, pi 10 di mai 1881, Carol I eara ancurunatu Văsille ali României. Aţea ţi easti sărbăturisită ca Dzuuă a Regalitatillei fu dzuuă naţională până la yinearea a comuniştilor la puteare. Pi 9 mai fu marcată Dzuua Europălleii. Tru un mesaj pitricutu cu aestă furñie, prezidentulu Klaus Iohannis spusi că Europa nu easti un bun amintatu, ama lipseaşti s’hibă viglleată niacumtinatu, tru contextul tru cari suntu fuvirsiti valorli ţi suntu la thimellilu a iriñillei mondiale di după Doilu Polimu Mondial, iara la nivel global ari ună tendinţă di fragmentare şi riaşezare geopolitică. “Protejânda Europa, nă vigllemu noi, securitatea şi prucukia a noastră. Ceareili europeane tră provocărli actuale suntu cearei tră yinitorul a cetăţenilor a noştri”, cundille liderul di la Bucureşti. El şi spusi pistusinea că agiutorlu a cetăţenilor români tră Uniunea Europeană şi tră valorli di thimelliu europeani va s’armănă niminati.



    Autoru: Stefan Stoica


    Armânipsearea: Taşcu Lala