Cu ună lundzime totală di aproapea 580 di km, Autostrada A1 ahurheaşti București și easti proiectată s’asiguripsească ieșearea cătă sinurlu cu Ungaria la Nădlac, cu treaţiri pritu Pitești, Sibiu, Diva, Timișoara și Arad. Ună mutrită pi harta lărdzită năspuni, tru idyiul kiro, că, tra s’bitisească Coridorlu European di la Vama Nădlac 2 la portul Constanța di la Amarea Lae, suntu ixiki nicaa 10 km di autostradă cu tuneluri anamisa di Lugoj și Diva și cumata di autostradă di 120 di km di pe Valea a Oltului. Cara ti secţiunea ixiki ditu judiţul Timiş sunt şasi constructori cari dipusiră oferte, ama simnarea a contractului nu poate s’hibă garantată până tru bitisita a anlui, pe traseulu ali autostradză Sibiu – Piteşti, di la 1 di agustu, tuti aţeali ţinţi loturi au contracte simnate. Dauă ditu aestea, aţeali ditu capiti, sunt tamam tru şantier. Iara uidisitu cu călindarea oficială, dimi aţea a contractilor simnate, tru şase ani autostrada Sibiu – Piteşti lipseaşti s’hibă hăzări.
România va s’aibă prota autostradă cari va s’tracă pisti Carpaţ, spune ministurlu a Transporturlor, Sorin Grindianu, cari lo parti la simnarea a contractului tră proiectarea şi execuţia a secţiunillei 3 a autostradăllei Sibiu – Piteşti, di aproapea 37 di km. Easti zborlu ti un contractu di 5,3 miliardi di lei (circa 1 miliardu di euro), cu ună durată di 12 di meşi tră proiectare şi aproapea patru añi tră execuţie. Easti nai ma greu ditu aţeali ţinţi tronsoane. Antreprenorlu lipseaşti s’ construiască 95 di apunţă şi pasaje, un tunel cu dauă galerii indipendinte, tru lundzime di 1,7 km/galerie, două noduri rutiere şi un ecoductu. Nai ma avansatu lot ali autostradă easti Sibiu – Boiţa, cu şansi multu mări di dişcllidiari până di sărbători, spuni ministrul Grindianu:
“Tuti ateali ţinţi secţiuni ali autostradă Sibiu-Piteşti disemnară amintători. Una ditu aeali, secţiunea 1, di la Sibiu la Boiţa, nă aştiptăm ca tu bitisita a aluştui anu s’poată s’hibă dată tru circulaţie. Ia că, păn tru bitisită, cu ună amănari cabaia mari, avem aesti contracte simnate, a diapoa aţelli cari amintară aesti licitaţii s’tiñisească termeñilli a contractului şi s’avem, aşi cum spuneam ma ninti, neise, după dz4ţ di añi, prima autostradă cari va s’tracă pisti Carpaţ.”
Armăni s’vidimu cum va shibă tiñisiti vadilurli, tru condițiile tru cari constructorlu a lotlui 3 lucreadză şi pi tronsonlu ditu câmpu di 30 km anamisa di Piteşti şi Curtea di Argeş, un segment multu ma lişor, ama amănatu.
Dragoş Burlan, reprezentantul a antreprenorlui exighiseaşti amănărli: “Pi aţelli 32 km ari proapea 146 di apunţă, aţea ţi faţi ca tearasamentul s’hibă ampărţătu ditu 30 tru 50, tru 100 m. Tră s’putemu s’intrămu la partea di tearasamente, noi atacămu cama ninti aesti apunţă. Proţentul respectiv, di 15%, easti dat di itia că până tru aestu kiro nu lucrămu dipu multu la tearasamente, tearasamentele li ahuhrimu di aproapea ţinţi stămâñi.”
Ministurlu a Transporturilor nica dimăndă că meslu aestu s’dişcllidu și dauă şantiere pe Autostrada ali Moldovă A7, Ploieşti-Paşcani, finanţată pritu PNRR.
Autoru: Corina Cristea
Armânipsearia: Taşcu Lala