AGIUTOR. Tru România, persoanele zñiipsiti di ateali ditu soni dizastre a fisillei va s’aibă agiutoru di la stat, după ţi guvernul aprobă adză un proiect di rezoluție tru aesta noimă. Nai ma mulţă păradz, anvărligda di 2.000 di euro, va s’ducă cătă familiile și persoanele a curi nicukirati fură zñiipsiti tru proporție di pisti 75%. Tru cazlu a diceselor, familiile a dicedatlui va s’llia ună sumă suplimentară di 1.500 di euro, indiferent di numirul a victimelor. Tru aestu kiro, Administrația Apelor Române spuni că rezerva strategică di apă ditu prinţipalele 40 di lacuri a văsiliillei, acă easti tru scădiare di la ahurhita a meslui alunaru, easti axi s’anvălească anănghiserlir a tutuloru beneficiarilor relevanță. Simfunu cu datili actuale, aproapea 800 di localităț au băgată restricții di alimentare cu apă, iara xerea s’duţi ma largu maxus tru notu. Tru aţea ţi mutreaşti culturile, fură zñiipsiti până tora un total di 205.000 di ictări di agări.
AGRICULTURA Randamentul di yipturi ali Romanie easti duri tra s’anvălsească căftarea interna si născănti exporturi, diclară adză ministrul ali Agricultură Petre Daea, di itia că 96% ditu biriketi fu adunată. Tempearaturli analti și xerea extinsă zñiipsiră culturile maus floarea soarelui și misurlu, tru tută văsilia. România easti unu di nai ma mări exportatori di yipturi ditu UE și un exportator activ tru Orientul di Mesi. Anlu ţi tricu, văsilia avu biriketi recordu, nica şi 11,3 milioane di tonuri di gărnu. Randamentul internu di yipturi easti tru nghenearal di 2-3 ori ma mari andicra di căftarea internă.
COVID-19 Yinitoarili variante a noului coronavirus va shibă nai ma probabil nu multu agresive, ama lişor ti dari unu alantu, lugurseaşti șeful Institutului di Boli Infecțioase Matei Bălș, Adrian Marinescu. El spune că pandimia agiumsi tru ună catandisi tru cari bănămu cu viruslu și mulță ditu persoanili infectate dukescu lăngoarea ca hiinda idyealui cu ună arăţimi comună. Ministrul ali Sănătati Alexandru Rafila nu excludi ună a 7-dalgă di pandimie tru România tru aestă toamnă, când școlliurli și universitățile ahurhescu diznău cursurile. Miercuri eara raportate pisti 9.100 di cazuri noi di COVID-19, majoritatea tru București și tru judițele Cluj și Timiș. Aproapea 4.000 di pacienți cu COVID suntu internați tru spital, ditu cari aproape 550 sunt cilimeañi. 284 di pacienți sunt la tearapie intensivă și fură raportate, tutunăoară, 41 di dicese ligate di COVID.
TAIPEI. UE căftă ca mintireaşili ligate di vizita a Prezidintului a Camerei Reprezentanților a SUA, Nancy Pelosi, tru Taiwan s’hibă ndreaptă pritu dialog și ca tute canalele di comunicari cu China s’armână dişcllisi, tra snu s’facă alathusi. China ari askerea tru alertă maximă ca apandisi la vizită, pe cari u lugurseaşti ună provocari. Ministerul chinez ali Apărari dimăndă opearațiuni militare țintite”, a diapoa Comandamentul di Est ali Armată di Elibearare a Popului diclară că feaţiră exerciții cu foc real aproapea di Taiwan, ună nisie auto-condusă pe cari China u lugurseaşti parte a teritoriului a llei. La Washington, administrația Bidin spune că nu easti ananghi ca autoritățile chineze s’lugursească aestă vizită tru ună criză. Purtătorlu di zboru ali Casa Albă tră securitate națională, John Kirby, diclară că prezidintulu a Camerăllei are ndreptul ti s’facă vizita Taiwan, ama cundille că călătoria nu fu ună călcari a suvearanitatillei chineze i a Politicăllei One China. Vizita, cari nu fu ndrupătă di prezidintulu american Bidin, easti prima a unui ofiţial american la aestu nivel tru 25 añi ditu soni.
Autoru: Udălu a hăbărloru
Armânipsearia: Taşcu Lala
