Căftati cu insistență di liderlu di Kiev, tancuri greali occidentale va s’agiungă tru yinitorlli meşi tru Ucraina. Statili Unite şi Germania dimăndară tru idyea dzuuă, ñiercuri, că va s’pitreacă tancuri tru teritoriile ucrainene, iu di 11 meşi armata ali Ucraina țăni keptu a aţillei arusă. Prezidentu Joe Biden feaţi hăbari la Casa Albă:
“Adză dau hăbari că Statele Unite ali Americă va s’pitreacă 31 di tancuri Abrams ti Ucraina, echivalentul a unlui batalion ucrainean. Secretarlu ali apărari, Lloyd Austin, feaţi urminii ti aestă jgllioată, tră aţea că va u anvărtuşeadză capacitatea ali Ucraina tra ş-apăra teritoriul şi tra ş-agiungă obiectivili strateghiţi.”
Cu maş ndauă săhăţ ninti şi după ma multi ndriseri, guvernul di Berlin avea dimandată oficial că va s’pitreacă ali Ucraină tancuri Leopard 2 şi va s’da izini la alti văsilii diznău s’exportă blindatili respective cătră Kiev. Cancelarlu gherman Olaf Scholz apăndăsi la stepsurli di amănari, spunânda că fu ananghi di consultări cabaia multi cu aliaţllii şi partenerlli internaţionali:
“Acţionânda tru ună turlie coordonată, la nivel internaţional, ma largu va nă asiguripsimu că aestu agiutoru easti di căuli fără ca riscurli la adresa a văsiliillei a noastri s’ascapă di sumu control.”
La oara a hăbărisearillei, maş Polonia avea căftată ufiţialu a Berlinlui ună autorizaţie di reexportu, ama Norvegia, Olanda şi Spania ș-avea spusă și eali naetea tra s’da ali Ucraină ahtări tancuri. Ghermania cundille că va s’llia hargili ti blindatili Leopard 2 pi cari va li durusească ali Ucraină. “Nu ştiu di tamam cari va s’hibă volumlu la cari va s’agiungă aesti hărgi, ama Ghirmănia vali ambărţiteadză”, spusi Scholz.
Polonia, alliumtrea, cari dimăndă că easti ndreaptă s’transferă ali Ucraina ditu a lyi stoc di tancuri germane Leopard 2, cundille că va s’caftă ali UE să-lli toarnă hargea aluştoru şi ari nădie că Bruxellesul va să spună “dovadă di bunăvreari” tru aestu caz.
Acordul ta s’pitreacă dzăţ di tancuri moderni Ucrainăllei va s’hibă determinant, declară tră BBC secretarlu general al NATO, Jens Stoltenberg. El spusi că tancurli va li suplimenteadză semnificativ putearea a forţilor ucrainene, agiutănda s’pingă atacurli ruseşti și să xanaamintă teritorii.
Kiev, prezidentulu Zelenski căftă ca aestea s’hibă livrati iruşi şi tru numiru ţi s’hibă duri. Rusia apufusi tăxearea di tancuri occidentale ca hiinda ună escaladari periculoasă, aţea ţi Stoltenberg nu negă. “Lipseaşti să scadă riscul a escaladarillei anaparti di Ucraina a unlui polimu anamisa di Rusia şi NATO tru Europa, cari vrea s’hibă devastator, di vrea s’aducă multu ma multi zñii şi moarti andicra di ţi vidzumu tru Ucraina. Şi tamam aţea NATO şi criscu cabaia multu prezenţa tru partea estică (…). Aesta easti descurajare, nu ari ca scupo provocarea a conflictului, că nkidicarea a aluştui, ţănearea ali irini tru alianţa NATO”, declară Stoltenberg.
Autoru: Corina Cristea
Armânipsearea: Taşcu Lala