Di itia a confirmarillei prezenţa-a lumakillei africană a coronaviruslui Omicron pi teritoriulu ali Românie și tra s’ayălisească arăspândearea aliştei tru perioada sărbătorlor di iarnă, autorităţli li feaţiră ma serti regulile di intrare tru văsilie tru ună andamasi di ananghi, convocată dumănică di premierlu Nicolae Ciucă. Anamisa di misurli dimăndati s’arădăpsescu băgarea a testilor PCR, inclusiv tru cazlu a aţiloru vaccinați, adrati cu nai multu 48 di săhăţ nintea a călătoriillei, tră aţelli cari yin di nafoara a Uniunillei Europene şi carantină tră atelli nivaccinaţ ică nu tricură pritu lăngoari tru șasilli meşi ditu soni. Atelli cari yin ditu văsilii ali Uniuni Europeană va s’prezintă certificatlu veardi cari să spună că easti faptă vaccinarea, triţearea pritu lăngoari tru ateali ditu soni 180 di dzăli ică rezultatlu negativ a unui test PCR, loatu cu nai multu 72 di săhăţ nintea-a călătoriillei.
Ministrul a Sănătatillei, Alexandru Rafila, exighiseaşti că: “Persoanili nivaccinate ică aţeali cari nu tricură pritu lăngoari tru şasilli meşi ditu soni călăturescu ditu alti stati membri ale Uniunii Europene aflate tru zona aroşe va s’hibă carantinate kiro di 10 dzăli. Cara persoanili nivaccinate şi cari nu tricură pritu lăngoari nu prezintă un test RT-PCR realizat cu 72 di săhăţ nintea-a călătorilliei va s’intra tru carantină kiro di 14 dzăli.”
Ma multu, tuţ cetăţenii cari s’toarnă tru văsilie tru perioada yinitoare va s’hibă obligaţ s’completeadză un formular tră localizarea a pasagerlui, implementat pana tora tru alti văsilii, documentu anănghisitu ti realizarea a anchetăllei epidimiologhiţi. Avânda tru videală numirlu mari di români aștiptați, ca tru acthi an, s’yină diznău tru văsilie cu ucazia a sărbătorilor di iarnă, seflu a Dipartamentului tră Situaţii di Urgenţă, Raed Arafat, exighisi că formularul va lipsească s’hibă părăstisitu la sinuru ditu acestu mesu. Aşi cumu spuni el, va s’ndreagă tu aestă noima şi ună strategie di comunicari tră ufilisearea a tutulor vectorlor di informare.
Raed Arafat: “Atelli cari tora călăturescu tru alti văsilii europene ştiu că aest formular există şi lipsea s’lu completeadza ninte s’călăturească ică la agiundzeari tru văsilia respectivă. România va s’bagă tu lucru aestă turlie di formular ahurhinda cu 20 di andreu.”
Uidisitu cu unu comunicat dimăndatu di Guvern, misura ti ufilisearea a formularlui di localizare a pasagerlui fu analizată avânda tu videală numirlu mari di români aştiptaţ s’torană tru văsilie tru perioada a sărbătorlor di iarnă, tră vigllearea a populaţiillei şi licşurarea ti libira urdinari, tru contextul di alănceari şi extindirea a nauăllei lumaki Omicron. Tru perioada a sărbătorlor, purtarea a prusupidăllei va s’hibă orlea zorlea obligatorie tru spaţiili cu călbălăki indiferentu di incidenţa a cazurlor di covid.
Autoru: Daniela Budu
Armânipsearea: Taşcu Lala