Miracleadzllii a filmului, bucureasteañi au ucazea s’veadă, până pi 23 di mai, ună selecție de 33 de filme, ditutre cari 27 tru premieră națională, pripuse de organizatorlli a Festivalui a Filmului European. Festivalu ahurhi tru 9 di mai, tamam ti Dzuua a Europăllei, la Timișoara, capitală culturală europeană tru aestu an, și s’dusi ninti la Oraviţa, anamisa di 12 şi 14 mai. La Bucureşti, evenimentul fu dişcllisu, luni dicseară, la sala Auditorium a Muzeulu Naţional di Artă ali Românie, cu filmul “The Pod Generationˮ, ună coproducţie Belgia, Franţa, Marea Britanie, regizată de Sophie Barthes și premiată la Festivalu Sundance.
“Easti un film cari bagă multi ntribări ti sinurli anamisa di artificial şi real, nă faţi, vahi, s’reconfigurăm ideea pi cari u avem noi işiş ti atea ţi easti şi nu easti hirescu, ma multu di ahătu, acaţă ună temă cari easti vahi nai ma sacrosantă di tuti ică nai ma intangibilă tru spaţiul public – concepţia a unui cilimeanuˮ, declară directorul artistic a festivalului, criticlu de film Cătălin Olaru.
Aestu cundille, di altă parte, parteneriatlu cu Biroulu a Parlamentului European tru România: “Anda aduţemu tu muabeti parteneriatlu a nostru cu Biroul Parlamentului European tru România, voi s’aduc aminti ateali dauă filme pi cari va li proiectămu la FFE di itia aliştei colaborari. Easti zborlu di Will-o-the-Wisp, tru regia al João Pedro Rodrigues, şi Kurak Günler/ Burning Days, regizat de Emin Alper, selectat tru cadrul a secţiunillei Un certain Regard a Festivalului de la Cannes de anlu ţi tricu. Will-o-the-Wisp, tru regia al João Pedro Rodrigues, poati s’hibă catalogat până tru soni ca iinda căvgăgi. Easti și ună şcurtică ţi u făţemu, ca organizatori, cu partenerllii a noștri di la Biroul a Parlamentul European tru România, ta s’aduţemu tu festival, pi ningă oferta avută pi cari u prezentăm, nu maş filme călduțe, fronimi, cari s’nu cărtească pi vărnu, ama și titluri provocatoare. Iara Will-o-the-Wisp easti, cadealihea, unu di aestea.”
Festivalu a Filmului European easti organizat de Institutul Cultural Român, cu agiutorlu a Reprezentanţăllei Comisiei Europeane tru România şi EUNIC România, tru parteneriat cu Uniunea Cineaștilor ditu România, ambasadele, centrele şi institutele culturale europeane. Tema alisteii ediții easti inteligenţa artificială. “Anlu aestu, idyealui cum şi anlu tricut, pripusimu ună temă cari easti di sinferu şi multu tru debatu tru aesti momente, ti atea că filmul european nsimneadză şi debaturi, pi ningă diversitate, pi ningă echilibruˮ, spusi prezidentulu ICR, Liviu Jicman. “Filmul european nsimneadză teme ică ntribări pi cari s’nă li băgămu, ma multu di minduearea tra s’damu apandisi, nă băgămu ntribări şi nă fati s’nă minduimu, adăvgă Liviu Jicman. Ditu 18 di mai, festival va s’ducă ninti, kito di ndauă dzăli, tru alti localităţ ali Românie – la Curtea de Argeş, Botoşani și Gura Humorului.
Autoru: Leyla Cheamil
Armânipsearea: Taşcu Lala