România fu şi va s’armănă “spaţiu di siguranţă şi isihie” tră dăldzăli di arifugaţm cari yin ditu Ucraina viţină — taxi şeflu a Guvernului di la Bucureşti, Nicolae Ciucă. El adusi aminti că România ş’lo ună ş-ună după invazia ali armată arusă, diclanşată pi 24 di şcurtu, rolu di partener di pistipseari european şi internaţional ti kivernisearea-aliştei criză, nai ma greaua ditu Europa di după Doilu Polimu Mondial. Tru raportul mutrinda eforturile şi realizările tru domeniul asistenţăllei umanitare a arifugaţlor, a ndrepturilor cilimeanlui şi alti categorii vulnerabile pi anlu 2022, realizat di Departamentul tră responsabilitate socială comunitară şi grupuri vulnerabile, s’cundilleadză că “România fu prota văsilie ditu Uniunea Europeană cari adoptă un plan naţional di misuri di incluziune şi protecţie a arifugaţlor pi vade di mesi şi lungu şi pripusi a statilor europeane un model di leadership şi coordonare la nivel politic tru domeniul a integrarillei arifugaţlor.” Pisti 3 milioane di cetăţeañi ucraineni, spuni raportul, “nă tricură sinurli tru 12 meşi ditu soni, ditu cari pisti 2,5 milioane avură hăiri di agiutoru direct di la Guvernul a României ică di la partenerllii aluştui: transport gratuit, hrană, strañe, apanghi, cazare pi lungu kiro, agiutor financiar di urgenţă, dzăţ di ñilli di intervenţii şi serviţii medicale şi soţiale gratuite, acces la piaţa a lucurlui şi tru şcolile româneşti ică garanţia siguranţăllei oferită di statutlu di protecţie temporară oferit” di statlu român.
Tutunăoară, precizează premierlu, România “ahărdzi şi nai ma importante coridoare di agiutoru internaţional tră Ucraina, di băgă la dispoziţie infrastructura a llei naţională rutieră, feroviară, fluvială şi maritimă” tră exporturli ucrainene, tru amprotusa ateali di yipturi ahărdziti ti păzărli a lumillei. Decidenţăllii di Bucureşti aduc aminti şi parteneriatlu extinsu cu agenţiile ONU, cu autorităţli locale, cu societatea civilă şi cu mediul privat, cari lli-agiutară s’da ună apandisi coerent şi hăirlătică ti criza umanitară ditu văsilia viţină. “Himu tru etapa tru cari lipseaşti s’avem ună abordare orientată pi misuri di integrari temporară ică pi vade di mesi şi lungu, tru cari arifugaţllii ucraineni s’poată s’aibă un bănaticu independentu tru văsilia a noastră, integraţ tru câmpul a lucărlui, iarq cilimeañilli a lor hărsinda-si di educaţie şi di bana socială” — cundille primlu ministru. Nai cama mulţă ditu atelli cama di 3,3 milioane di arifugaţ ucraineni cari tricură sinurlua românescu acăţară ma largu calea icătă văsilii ditu ascăpitata ali Europă, ama aproapea 100 di ñilli, cundilleadză autorităţli di la Bucureşti, aleapsiră s’armănă aoa. Uidisitu cu ună apofasi tora ayoñea adoptată di Guvernul di la Bucureşti, atelli cari intră tru România pi la yimbrukili cu Ucraina şi Ripublica Moldova va s-aibă hăiri şi anlu aestu di transportu gratuit cu trenlu/ pamporea. Transportul gratuit s’da ti un kiro di ţinţi dzăli ditu oara anda intrară tru văsilie.
Autoru: Bogdan Matei
Armânipsearia: Taşcu Lala
