Forţele navale române, rol important pi flancul estic al NATO
Forţele Navale Române contribuie cabaia ti fătearea ma bună securitatea reghională, europeană şi euroatlantică, iar misiunile disvărtiti di aliaţii şi partenerii ditu NATO şi Uniunea Europeană atea turlie ca apile teritoriale şi aţeali a lumillei s’hibă ma sigura spunu acutotalui aestu lucru. Easti aţea ţi declară prezidentulu Klaus Iohannis, marţă, la sărbătoarea marinarilor militari. Tră doilu an arada, Ziua Marinei fu nsimnată tru contextul a conflictului ruso-ucrainean. Prezidentulu spusi că securitatea ali Românie fu anvărtuşită şi că eforturile di anvărtuşeari a structurlor Alianţăllei di pi teritoriul a văsiliillei, maxus a grupului di alumtă NATO thimiliusitu tru 2022, va s’hibă dusi ma largu. Tu arada a lui, premierul Marcel Ţiolacu taxi că executivul va u ţănă tu idyea scară ahărdzita bugetară di 2,5% ditu PIB tră forţele armate şi va s’asiguripsească resursele anănghisiti ti armătusearea şi modernizarea a Forţelor Navale. Fost şef a Statului Major, Nicolae Ţiucă, tora prezidentu a Senatlui, spusi că zona ali Âmarea Lae agiumsi ună zonă di mare relevanţă strateghică tră partenerlli nord-atlantiţ. Securitatea aluştoru api asiguripsescu stabilitatea ti tută regiunea şi transformă România tru un furnizor important di securitate, lugurseaşti Nicolae Ţiucă. Tru minduita a ministrului ali Apărari, Angel Tîlvăr, polimlu ditu Ucraina spuni cât di importantu easti ca România, văsilie cu işeari la Amarea Lae, s’aibă capaţităţi tră sa-şi veaglle apile teritoriale şi zona economică exclusivă. Iara ministrul di Interne, Cătălin Predoiu, spusi că, ditu postura di văsilie di sinuru a Uniunillei Europeane şi a Alianţăllei Nord-Atlantică, România tiñiseaşti cu băgarea tu practico borgili ţi ălli si cadu tru calitate di membru al aluştoru organizaţii-clleaie tră prucukia şi siguranţa a văsiliillei.
Obiective ţivile ucrainene aproapea di România, ţinti a atacurlor aruseşti
Structurile a Ministerului ali Apărari cari asigură monitorizarea a spaţiului aerian nu aflară fuvirseri di turlie militară la adresa a teritoriului naţional ică a apilor teritoriale ale României. Informarea ministerului di la Bucureşti avu scupolu s’isihăsească populaţia după atacurli cu drone executate tu giumitatea aliştei stămână di armata rusă tu infrastructura ditu porturile dunărene ucrainene Ismail şi Reni, ţi suntu aproapa di sinurli ali României. Exploziile s-avdzără şi tru portul fluvial românesc Galaţi. Ministerlu dimăndă că anvărtuşi miăsurile di vigilenţă apufusiti simfunu cu planurli naţionale şi aliate şi monitorizeadză niacumtinatu spaţiul naţional terestru, maritim şi aerian tru cooperare cu structurli NATO, cilăstăsinda ti anvărtuşearea ali apărari pi tutu Flanculu estic şi discurajarea iţi fuvirseri contra a teritoriului aliat. Tutunăoară, ministerlu ali Apărari condamnă sertu atacurli fapti ma multi ori arada di Rusia contra a zonilor bănati di populaţia ţivilă şi a elementelor ditu infrastructura critică ali Ucraina şi năpoi u spuni că polimlu di agresiune nkisitu di Moscova easti ună călcari flagrantă a ndreptului internaţional. Şi ministrul di Externe, Luminiţa Odobescu, cutugursi cu zboară serti atacurile repetate ale Rusiei contra a oamenilor ţi nu au căbati şi tu infrastructura ţivilă, inclusiv a silozurilor di yipturi ditu porturli ucrainene Reni şi Ismail. Pritu aesti călcări flagrante ali legislaţiei internaţională, Rusia ma largu bagă tu piriclliu securitatea alimentară globală şi siguranţa navigaţiei tru Amarea Laeyipturloru, angrăpsi, pi Twitter, Luminiţa Odobescu. Porturile Ismail şi Reni agiumsiră prinţipala rută di işeare a yipturloru ucrainene, după ţi Rusia s-trapsi ditu acordul ndrupătu di ONU cari asigura un transport sigura pi Amarea Lae.
Date şi previziuni economiţi, nica şi un avertismentu
Institutul Naţional di Statistică dimăndă că Produsul intern brut ali României criscu cu 0,9% tru trimestrul II, comparativ cu trimestrul di ma ninti, iara tru primlu semestru criscu cu 1,7% comparativ cu primul semestru a anlui tricut. Comisia Naţională di Strategie şi Prognoză u ţăni aşi, previziunea di creaştire economică tră anlu 2023 la 2,8%, cât estima şi tru varianta di primveară, ama tră 2024 u ñîcură di la 4,8% la 4,2%. Revizuirea tru anghiosu a dinamicăllei PIB avu ca fundament procesul di redresare lentă a sectorlui industrial tru condiţiile di ţăneari incertitudinea mutrinda evoluţia conflictului di la sinurlu ali Românie. Banca Mondială li ţănu, tora ayoñea, la 2,6% estimările mutrinda creastirea economiei româneşti tru aest an, kiro tu cari Fondul Monetar Internaţional spusi un avans al PIB di 2,4%. Comisia Europiană u feaţi cama bună isapea di primveara mutrinda creastirea PIB-ului ali Românie tru aestu an şi anlu yinitoru, iara uidisitu cu năili prognoze economia va s’nreghistreadză ună creastire di 3,2% tru 2023 şi di 3,5% tru 2024. Di altă parte, Consiliul Fiscal u revizui tru creaştere proiecţia di defiţitu bugetar tră anlu aestu, estimânda că aestu va năstreacă, vahi, 6% ditu PIB, tru absenţa a niscăntoru misuri di corecţie a dearapajlui bugetar. Simfunu cu Raportului anual ali instituţie, procesul di anvărtuşeari fiscal-bugetară reclamă ună creastire semnificativă a veniturilor fiscale, cari suntu la un nivel inadmisibil di nghiosu tru raportu cu anănghiserli ali României şi cu alanti state membre ale UE. Suntu anănghisiti, spune Consiliul Fiscal, eliminarea exceptărilor ditu legislaţia actuală şi creastirea efiţienţăllei ti colectari prin discurajarea optimizărilor fiscale şi ñicurarea a evaziunillei.
Două echipi româneşti di fotbal, tru play-off-ul Europa Conference League
Campioana României la fotbal, Farul Constanţa, şi diţinătoarea Cupăllei, Sepsi Sfântul Gheorghe, s-calificară tru play-off-ul Europa Conference League. Farul amintă tu giumitatea a stămănăllei, şi returul ditu deplasare cu echipa Flora Tallin, ditu Estonia, iara covăsneañilli azvimsiră pi Aktobe tru Kazahstan, după ţi avea faptă isa la Sfântu Gheorghe. Dauă echipi nordiţi va s’hibă adversarele a românilor tru play-off: HJK Helsinki (Finlanda), tră Farul şi FK Bodoe/Glimt (Norvegia) tră Sepsi. Tut ună formaţie nordică, FC Nordsjaelland, ditu Danemarca, u curmă calea a vicecampioanăllei FCSB ti play-off-ul Europa Conference League.
Autoru: Stefan Stoica
Armânipsearea: Taşcu Lala