Autorităţli di Bucureşti hiritisira victoria al Donald Trump tru alidzerle prezidenţiale dit Statele Unite şi pitrcura mesaje di hiritiseari. Prezidentul Klaus Iohannis cundil’e angajamentul susto ali Românie tra s-ahanduseasca, cu yinitoarea administraţie americană, cooperarea tru domeniul a securitatil’ei şi tra s-creasca componenta economică a Parteneriatlui Strategic bilatearal: “Pitricum una carti di hiritiseari a prezidentului aleptu a Statelor Unite ali America, domnul Donald Trump. Al’i dimandam că him hazari ti colaborari, tra s-anvartusim Parteneriatlu Strategic anamisa di România şi Statele Unite ale Americii. Ma s-aiba alaxeri ? Ari cabili ti alaxeri, tru noima că s-anvartuseasti aestu parteneriat cu ateali trei componenti – politică, di securitate şi economică. Di multu chiro spusu că, macă protili daua lucreadza ti anami, easti ananghi s-avem ma multă colaborare economică şi vahi aoa avem una oportunitate.”
Şi premierlu Dacian Cioloş zbura tra simasia a Parteneriatlui Strategic anamisa di România şi Statele Unite şi di una menga criscută tra dezvoltarea şi ahandusearea a ligaturlor maxus economiti. Di alta parti, uidisitu cu analiştil’i, una politică economică mintimenă di partea a Bucureştiului poati s-u-aduca România tru una semti favorabilă tru ligatura cu SUA. Donald Trump easti un om di emburlachi cari spuni sinfer tra argumentili financiare. Ti atea, România lipseasti s-amintă investiţii americane cât cama vartoasi, atea turlie tra s-hiba acatata tru isapi la Casa Albă.
Tru planlu ali politica externa, Vladimir Socor, analistu politic a Fundaţiil’ei Jamestown, acata tru isapi subiectul ‘Rusia’: Nu minduescu ici tru idheea că domnul Trump va s-hiba hazari tra una achicaseari di turlia Ialta cu Rusia al Vladimir Putin. Easti una idhee ti u lugursescu zn’iipsitoari prota s-prota tra sinferurli a vasiliilor dit zona a noastră: am tru videala Europa Tentrală şi dit Apirită, tut spaţiul di la Amarea Baltică până la Amarea Lae. Idheea a unei naua Ialta easti una demoralizatoare, una cari, vrem nu vrem, deliberat ica nedeliberat, poati s-da curayiu ti tendinţili di nauntrul a zonal’ei a noastra să anticipeadza una Ialtă, prit achicaseri ahoryea, bilatearali cu Rusia al Putin. Ialta fu un fenomen unic şi numata va sa s-faca diznau varaoara niti tru turlia originală, niti tru una turlie alaxită.”
Tru arada a lui, analistul Iulian Fota, cundil’eadza tra aravdari: Ştim ghini că tru campanie sa spun lucri cari deapoa suntu napoi griti altaturlie, suntu amendati, la nascanti nica si s-tradzi mană. Io minduescu că lipseasti s-aştiptăm s-videm naulu prezidentu ali SUA, prezidentul aleptu, domnul Donald Trump, ti va tra s-adara tru politica externă americană. Nu minduescu că ari noima tru aesta oara s-cilastasimu emoţional. Di altă parte, avem problemili a noastri isisi tru Europa ica tamam tru România, că yin alidzerli ti un mes di dzali şi nica niheama şi cadealihea că na minduim cum poate s-hiba influenţată catastisea di la noi di catastisea dit SUA. Ama io minduescu că tru aesta oara lipseasti s-lom tuţ una hopa, s-nă danasim, s-sidem arihati, s-nu him ahat emoţionali şi s-aştiptăm ca prezidentul aleptu să-si spuna minduita.” Donald Trump va s-pril’ia mandatlu la Casa Albă tru meslu yinaru.
Autor: Roxana Vasile
Armanipsearea: Tascu Lala