Şeful statlui român, Klaus Iohannis, ş’bitisi, marță, tru Argentina, volta di ună stămână tru America Latină. Aesta ahurhi cu ună vizită oficială tru Brazilia, iu s’adună cu omologlu a lui, Luiz Inacio Lula da Silva, iara, la Rio di Janeiro, cu reprezentanţi a autorităţilor locale. A doua etapă u reprezentă vizita tru Chile, context tru cari şeful statului român s-adună cu prezidentulu, Gabriel Boric. Tu bitisita a voltăllei, tru Argentina, Klaus Iohannis feaţi ună isapi:
“Avuiu furñia să zburăscu, după mulţă ani di cându nu mata s’ari faptă pi livelu di prezidentu, cu soţ tradiţionali ali României. Suntu multu importante aesti ligături. România easti vidzută ghini, ama ambiţia a mea easti s’hibă nica vidzută şi s’akicăsească soţlli a noştri că vremu ună ahănduseari alithea a ligăturilor. Minduescu că, pritu aestă vizită, avum contribut la ună conştientizare importantă. România există, easti prezentă şi va s’ahăndusească aesti ligături. Fum aştiptaţ cu mari tiñie pisti tut, cadialihea şi aoa, tru Buenos Aires, şi, pi aestă cale, voi s’lă haristusescu ti aştiptarea şi dişcllidirea cu cari fumu tiñisiţˮ.
Vizita prezidintului român tru Argentina easti prima la aest nivel tru aeşţă ditu soni 30 di ani. La Buenos Aires, discuțiile a lidirului di București, Klaus Iohannis, cu omologlu a lui argentinian Alberto Fernándiz avură tu scupo darea silă a dialogului politico-diplomatic bilatearal, maxus pi teme multu importante emu tră România, emu tră Argentina. Easti zborlu di protecţia fisillei, akăxerli climatiţi, educaţie, cercetare şi inovare, ama şi digitalizare, agricultură, energie veardi, energie nucleară, cultură şi turism. Tutunăoară, fură simnati dauă memorandumuri di akicăseari: unu tru domeniul a catandisiloru di ananghi, alantu tru sectorlu a cercetarillei agricole şi al protecţiei tră fise.
Tru Brazilia, prezidintulu a Româniillei, Klaus Iohannis, și omologlu a lui, Luiz Inacio Lula da Silva, apufusiră ună diclaraţie comună mutrinda dizvoltarea ligăturilor bilatearale tru ma multi domenii. Klaus Iohannis lu asiguripsi pi Luiz Inacio Lula da Silva di agiutoru tră avansarea agendăllei UE – Brazilia. Tu arada a lui, prezidintulu brazilian spusi că, pi ningă ligăturli politiţi şi comerciale pi cari văsilia a lui li ari cu România, suntu importante şi ligăturile umane, tră aţea că, tru Brazilia, băneadză cama di 40.000 di cetăţeni di orighine română.
Tru Chile, Klaus Iohannis și omologlu a lui, Gabriel Boric, s’akicăsiră ti dizvoltarea cooperarillei bilatearale tru comerţ, investiţii şi alti domenii importante di activitate. Cu aestă nispeti fu simnatu un memorandum di colaborare anamisa di instituţiile ditu aţeali dauă văsilii, responsabile di kivernisearea a situaţiilor di ananghi. Documentul mutreaşti coopeararea tru domeniul intervenţiilor la cutreamburi di locu şi incendii di păduri. Tutunăoară, Klaus Iohannis hăbărisi că protlu Lectorat di Limbă Română ditu America Latină va s’hibă discllisu, până tu bitisita aluştui an, la Universitatea ditu Chile.
Autoru: Bogdan Matei
Armânipsearia: Taşcu Lala
