Chilimi aroşi, oficialităț și admiratori, multi lilici, sumuarăsuri, ambărţitări și discursuri – aesta eara hăvaia, dumănică seară, anda s’turnă București lotlu ali Românie di la Campionatele Mondiale di Natație. Tru prota thesi – David Popovici, tinirlu di maş 17 di añi cari angrăpsi istorie! Dibutantu la Mondialele di seniori tru bazin olimpic, el agiumsi, s’hibă, protlu dupu 49 di añi, campion mondial la probili di 100 și di 200 di meatri liber tru cadrul a idyillei competiții.
David Popovici apufusi Budapesta şi dauă năi recorduri mondiale di giuniori tru aţeali dauă probe. Soţlu a lui, Robert Glinţă, agiumsi pi loclu ţinţi la 50 di meatri pi păltări, respectiv optu la 100 di meatri păltări. Dublulu campion mondial lă haristusi a suporterilor tră aţea că lu andrupără şi mărturisi că ari miraki ca pritu performanţa a lui s’inspiră cât ma mulţă oamiñi s’facă sportu.
David Popovici: “Voi s’lă haristusescu a aţiloru cari avură pisti tru mini, cari mi andrupără şi mi andrupăscu ma largu şi, neise, voi s’lă haristusescu a tutulor românilor cari mi mutriră şi cari şidzură cu suflitlu la gură dituintea a ecranelor, a românilor cari viniră s’mi mutrească la bazinu npersoană. Budapesta fu ti miraki şi, nu ştiu, minduescu că mulţă vor tra s’hibă tru catandisea a mea să ştibă că ahăntă multă lumi lli-andrupaşti şi escu hărăcop s’reprezintu văsilia aesta muşeată şi s’vă dukescu că hiţ diadunu cu mini, u spunu cu tut suflitlu.”
David Popovici fu tiñisitu cu ună premie di 200.000 di euro di partea a Guvernului ali Românie. Tu arada a lui, prezidintulu Klaus Iohannis apufusi s’lu tiñisească tinirlu tinirlu dublu campion mondial cu nai ma analtă nişani a statlui român – Orditulu Naţional Steaua a Româniillei tru grad di Cavaler, iara pi antrenorlu a lui, Adrian Rădulescu, cu Ordituul Naţional tră Merit tru grad di Cavaler. David easti urnekea şi va u ascumbusească tută văsilia. Noi avemu borgea s’adrămu bazine, s’agiutămu aestu sport, s’putemu s’avemu mulţă campioni. – diclară ministrul a Sportului, Eduard Novak.
Easti ananghi di multi tru sportul românesc, iara Mondialele di Budapesta lipseaşti s’ascumbusească Guvernul s’inveastiască tru infrastructură – spusi, tru arada a llei, prezidinta ali Fediraţie di Nataţie şi Pentatlon Modirnu, Camelia Potec, transformânda-si, canda, tru iholu a aţiloru cutugursiră, nu maş nă oară, slaba finanțare, atea ţi dusi, cafi anu, la rezultate tut ma slabe tru sporturi tru cari, vărăoară, româñillii era redutabili – gimnastică, fotbal, caiac-canoe … Emu, și tru anutari, maş harea, cilăstăsearea și agiutorlu a părinților și antrenorlui a lui lli-adusiră atinirlui tinirlui David Popovici ateali dauă titluri mondiale.
ʺAm nădia că dalga ţi u aduş ditunti şi cari ma largu va u duc ninti va s’agiută a sportului românescu s’facă jgllioati ninti, tră aţea că ari limbidu ananghi di ună ñică ascumbuseariʺ – spusi işişi campionlu mondial. Lu aşteaptă aestă veară, Campionatili Europene di giuniori ditu România, ditu 5-10 alunaru, Europeanili di seniori ditu Italia şi Mondialili di giuniori ditu Peru.
Autoru: Roxana Vasile
Armânipsearea: Taşcu Lala
