Dipu multi state dit regiune suntu interesate s-ancupără dit România transportoari blindate 8×8, ţi va s-hibă adrati Bucureşti, diclară la Radio România Actualităţ ministrul ali apărari, Mihai Fifor. El preciză că autorităţile şi spun vrearea că ună mari parti dit ateali dauă procente dit PIB alocate Armatălei s-hibă ndriptate cătră industria di apărare. Ase, România poati s-agiungă un producător şi un exportator importantu di armamentu modern tru zonă.
Ia ţi spusi Mihai Fifor: “Easti ananghi ca aestă industrie di apărare s-ahurhească diznâu cu lucurlu şi, cadealihea, prit investiţii susţănute s-putem s-agiundzem un hub regional ali producţie di armamentu. Un dit programele majore di nzestrări ale Armata Române easti atel referitor la transportoarele blindate 8×8, transportoare pi cari va li adrăm la Uzina Mecanică dit Bucureşti. Multi vasili dit regiune suntu interesate s-agiungă mustiradz ali Uzina Mecanica dit Bucureşti, em, lucrul aestu nu poati câ masi s-nâ hârseascâ.”
Ministrul apărării spusi cama pi largu şi ti dauă programe majore di nzestrare ali Armata. El aprecie că prima corvetă multirol produsă tru vasilie va s-hibă hăzări tru trei ani. Tut pi un şantier dit vasilie pot s-hibă adrati şi trei submarine militare: “Programlu aestu di alumtă submarină, nzestrarea cu trei submarine a Marinalei Militare Române nseamnă una jgljioata multu, multu mari tra anvartusearea a capacitatilʹei di alumtă ali Armata româna. Ambiţia noastră easti s-adrăm tru un şantier naval românescu şi aesti capacităţi, aesti submarine, aşi cum va s-adramu şi cu programul major di nzestrare referitor la ateali patru corvete multifuncţionale. Gioi, tru şedinţa di guvern, aprobăm apofasea di guvernu cari na permite s-lansăm programul a corvetelor multifuncţionale. Prima corvetă va s-hibâ opearaţională după primlii trei ani.”
Aflată tru flancul estic al NATO şi membru ali organizaţie dit 2004, România ahărzi, dit anlu tricut, 2% dit PIB ti nzestrarea ali armata, lucru cari continuă şi anlu aestu, tra asigurarea la nai ma analt nivel a securitatilei astei zone geostrategice.
Diznau Mihai Fifor: “Easti doilu an arada cu procentul di 2% alocat tra Armata României, 2% dit PIB. Cara 2017 fu anlu tru cari experimentam, să spunem, cilasatasindalui s-hargiuim hairlaticu suma di paradz alocată, 2018 lipseasti s-hiba anlu tru cari să spunem maturitate tru atea ti na pripusim s-adram.”
Uidisitu cu oficialu di Bucureşti, anlu 2018 easti un an multu importantu căte tru meslu alunar va s-tana summitul NATO iu România va s-aduca tru discuţie situaţia di securitate di la Amarea Lae.
Autoru: Daniela Budu
Armânipsearea: Tascu Lala
